पिंपळगाव रेणुकाई येथे निरंकारी सत्संग सोहळा उत्साहात संपन्न; भक्ती आणि समाजप्रबोधनाचा त्रिवेणी संगम!
By देवानंद बोर्डे
पिंपळगाव रेणुकाई येथे निरंकारी सत्संग सोहळा उत्साहात संपन्न; भक्ती आणि समाजप्रबोधनाचा त्रिवेणी संगम!
पिंपळगाव रेणुकाई / पारध:
“सन्तमती को धारण करके सब अच्छे बन जायेंगे । कहे हरदेव जुडेंगे सच से सब सच्चे बन जायेंगे ।”
या सुवचनाचा संदेश देत भोकरदन तालुक्यातील पिंपळगाव रेणुकाई येथे निरंकारी सत्संग मंडळाच्या वतीने आयोजित भव्य सत्संग सोहळा आणि समाजप्रबोधन कार्यक्रम मोठ्या उत्साहात संपन्न झाला. सदगुरू माता सुदीक्षा जी महाराज यांच्या असीम आशीर्वादाने आणि पारध ब्रांचच्या अंतर्गत आयोजित या कार्यक्रमाच्या अध्यक्षस्थानी छत्रपती संभाजीनगरचे झोनल इंचार्ज आदरणीय महात्मा सचिन अधाने जी उपस्थित होते.
पावसाची संततधार तरीही भाविकांची अथांग मांदियाळी
शनिवार, ४ जुलै रोजी आयोजित या सत्संग सोहळ्याच्या सुरुवातीला सकाळपासूनच परिसरात पावसाने जोरदार हजेरी लावली होती. मात्र, पावसाची तमा न बाळगता पारध परिसरातील खेड्यापाड्यांतून हजारो निरंकारी भक्तांनी आणि भाविकांनी या कार्यक्रमाला उत्स्फूर्त हजेरी लावली. संपूर्ण परिसर भक्तीच्या रंगात न्हाऊन निघाला होता.
२१ भक्तांना ‘ब्रह्मज्ञान’ प्राप्ती
या सोहळ्यासाठी जालना येथील ज्ञानप्रचारक तथा संयोजक आदरणीय राजकुमार जी परसवाणी प्रामुख्याने उपस्थित होते. त्यांच्या उपस्थितीत पार पडलेल्या या सत्संगानंतर तब्बल २१ निरंकारी भक्तांनी अत्यंत पवित्र असे ‘ब्रह्मज्ञान’ प्राप्त करून घेतले. यावेळी मुंबईचे महात्मा लक्ष्मण जी हिवरकर आणि पारधचे आदरणीय संपत जी काटोले यांचीही प्रमुख उपस्थिती लाभली होती.
भजन, कीर्तन आणि ओव्यांनी जिंकली मने
सत्संग सोहळ्यात सादर झालेल्या सुमधुर भजने, कीर्तने, विविध दाखले, अभंग आणि ओव्यांच्या माध्यमातून उपस्थित भाविकांची मने जिंकून घेतली. भक्ती रसात सर्व भक्तगण पूर्णपणे तल्लीन झाले होते. या संपूर्ण कार्यक्रमात निरंकारी मंडळाच्या सेवादलाने शिस्तबद्ध पद्धतीने सेवा करत आपले चोख योगदान दिले.
अनेक गावांतील हजारो भाविकांची उपस्थिती
या सोहळ्यासाठी पिंपळगाव रेणुकाईसह हिसोडा, करजगाव, रेलेगाव, पारध बुद्रुक, पारध खुर्द, कोठा कोळी, लिहा, शेलुद, मोहळाई, कोसगाव, वडद तांगडा, शिवना, गोळेगाव, अंभई, धवडा आणि वानसांवगी आदी गावांमधून हजारोच्या संख्येने महिला व पुरुष भाविक मोठ्या संख्येने उपस्थित होते.
सत्संग सोहळ्याच्या समाप्तीनंतर उपस्थित सर्व भाविकांसाठी ‘ज्ञानदान’ आणि ‘लंगर प्रसादाची’ (महाप्रसाद) उत्तम व्यवस्था करण्यात आली होती. कार्यक्रम यशस्वी करण्यासाठी पारध ब्रांच, पिंपळगाव रेणुकाई निरंकारी सत्संग मंडळ आणि सर्व सेवेकऱ्यांनी अथक परिश्रम घेतले.
