पारध पोलिसांची मोठी कारवाई! धावडा येथे शासकीय धान्याचा काळाबाजार उघड; २५२ क्विंटल साठ्यासह चौघांवर गुन्हा दाखल
By तेजराव दांडगे
पारध पोलिसांची मोठी कारवाई! धावडा येथे शासकीय धान्याचा काळाबाजार उघड; २५२ क्विंटल साठ्यासह चौघांवर गुन्हा दाखल
पारध / भोकरदन: सार्वजनिक वितरण व्यवस्थेतील (PDS) गरिबांच्या हक्काचे धान्य काळ्या बाजारात चढ्या दराने विक्री करण्याच्या उद्देशाने साठवून ठेवणाऱ्या मोठ्या रॅकेटचा पारध पोलिसांनी पर्दाफाश केला आहे. भोकरदन तालुक्यातील मौजे धावडा येथे पुरवठा विभाग आणि पारध पोलिसांनी संयुक्त छापेमारी करून तब्बल २५२.१६ क्विंटल अवैध धान्य साठा जप्त केला आहे. या प्रकरणी पारध पोलीस ठाण्यात चौघांविरुद्ध जीवनावश्यक वस्तू कायद्यांतर्गत गुन्हा दाखल करण्यात आला आहे.
जिल्हाधिकारी आशिमा मित्तल, पोलीस अधीक्षक तेगबीर सिंह संधू आणि जिल्हा पुरवठा अधिकारी सुकेशिनी पगारे यांच्या निर्देशानुसार ही धडक मोहीम राबविण्यात आली.
गोपनीय माहितीच्या आधारे संयुक्त पथकाचा छापा
धावडा येथे शासकीय धान्याची अवैध साठवणूक करून ते चढ्या दराने विकले जात असल्याची गोपनीय माहिती प्रशासनाला मिळाली होती. या आधारे सहाय्यक जिल्हा पुरवठा अधिकारी ज्ञानेश्वर दिवटे, पुरवठा निरीक्षण अधिकारी (भोकरदन) सदानंद नाईक, एन.व्ही. क्षीरसागर, आर.आर. पल्हाटे आणि पारध पोलीस ठाण्याचे सहाय्यक पोलीस निरीक्षक (API) संतोष माने यांच्या संयुक्त पथकाने २ जुलै २०२६ रोजी सायंकाळी ५ ते रात्री १०:३० वाजेच्या दरम्यान धावडा गावातील विविध दुकानांवर आणि संशयास्पद ठिकाणी अचानक छापे टाकले.
या आरोपीतांवर गुन्हा दाखल
तपासणीदरम्यान स्वतःच्या आर्थिक फायद्यासाठी विनापरवाना शासकीय धान्याचा साठा करताना खालील संशयित आढळून आले:
१) गुफरान सुलेमान शेख (शेख ट्रेडर्स, धावडा)
२) सैय्यद जमान सय्यद करिम (मराठवाडा ट्रेडर्सच्या बाजूचे दुकान, धावडा)
३) शेख जावेद शेख खाजा (शेख ट्रेडर्स, धावडा)
४) नाव फलक नसलेल्या एका घराचा अज्ञात इसम.
तपासणीत या व्यापाऱ्यांकडे धान्य साठवणूक, खरेदी-विक्री किंवा वाहतुकीसंदर्भातील कोणतीही कायदेशीर कागदपत्रे, साठा नोंदवही (Stock Register) अथवा वैध अभिलेख आढळून आले नाहीत.
गहू, तांदळासह गरोदर महिलांचा आहारही जप्त!
या कारवाईत पथकाने एकूण २५२.१६ क्विंटल वजनाचा विविध धान्याचा साठा आणि एक इलेक्ट्रॉनिक वजन काटा जप्त केला आहे. यामध्ये प्रामुख्याने:
गहू व तांदूळ: मोठ्या प्रमाणावर कट्टे.
इतर धान्य: मका, सोयाबीन, तूरडाळ, ज्वारी, चणा, चवळी आणि तूर.
महिला व बालकांचा आहार: धक्कादायक बाब म्हणजे स्तनदा माता, गरोदर महिला आणि १ ते ३ वर्षे वयाच्या लहान मुलांसाठी दिला जाणारा शासकीय पोषण आहाराचे ८५ पाकिटे देखील जप्त करण्यात आली आहेत.
जीवनावश्यक वस्तू कायद्यानुसार गुन्हा दाखल
या प्रकरणी पुरवठा निरीक्षण अधिकारी सदानंद शिवाजीराव नाईक (वय ३३) यांच्या फिर्यादीवरून पारध पोलीस ठाण्यात गुरन १९४/२०२६, कलम ३ व ७ जीवनावश्यक वस्तू कायदा १९५५ (Essential Commodities Act) अन्वये गुन्हा दाखल करण्यात आला आहे.
पोलीस ठाण्याचे पोहेकॉ जी.डी. भुतेकर यांनी ३ जुलै २०२६ रोजी रात्री ७:०४ वाजता हा गुन्हा दाखल केला असून, सहाय्यक पोलीस निरीक्षक संतोष माने यांच्या मार्गदर्शनाखाली पोलीस उपनिरीक्षक (PSI) वाल्मीक नेमाने या प्रकरणाचा पुढील तपास करत आहेत.
