जालन्यात अंमली पदार्थ बटन गोळ्यांची तस्करी करणाऱ्या दोघांना अटक, ७२ हजारांचा मुद्देमाल जप्त
By तेजराव दांडगे
जालन्यात अंमली पदार्थ बटन गोळ्यांची तस्करी करणाऱ्या दोघांना अटक, ७२ हजारांचा मुद्देमाल जप्त
जालना : शहरात मानवी जीवितास अपायकारक असलेल्या नशेच्या बटन गोळ्यांची अवैधपणे विक्री व वाहतूक करणाऱ्या दोघा जणांवर स्थानिक गुन्हे शाखा, अंमली पदार्थ विरोधी पथक आणि अन्न औषध प्रशासन विभागाने संयुक्त कारवाई केली आहे. या कारवाईत पोलिसांनी एकूण ९५ बटन गोळ्यांसह ७२,७६० रुपये किमतीचा मुद्देमाल जप्त केला असून, सदर बाजार पोलीस ठाण्यात गुन्हा दाखल करण्यात आला आहे.
गुप्त माहितीच्या आधारे संयुक्त कारवाई
पोलिसांकडून मिळालेल्या माहितीनुसार, जालना शहरात काही इसम विनापरवाना व मानवी आरोग्याला घातक असलेल्या औषधीयुक्त गोळ्यांची चोरटी विक्री करत असल्याची गोपनिय माहिती पोलिसांना मिळाली होती. या माहितीच्या आधारे स्वामी विवेकानंद हॉस्पिटलजवळ सापळा रचून दोन संशयितांना ताब्यात घेण्यात आले.
चौकशी दरम्यान त्यांनी आपले नाव आकाश सुरेश डोंगरे (वय २३) आणि अश्फाक असलम शेख (वय २३, दोन्ही रा. हनुमानघाट, ता. व जि. जालना) असल्याचे सांगितले. त्यांच्या अंगझडती घेतली असता त्यांच्याकडे एकूण ९५ प्रतिबंधित बटन गोळ्या (Nitrosun 10) आढळून आल्या.
जप्त करण्यात आलेला मुद्देमाल
पोलिसांनी आरोपींकडून गोळ्यांसह मोबाईल आणि वाहन असा एकूण ७२,७६० रुपये किमतीचा ऐवज जप्त केला आहे:
- आकाश सुरेश डोंगरे याच्याकडून: ४५ प्रतिबंधित गोळ्या (Nitrosun 10), एक मोबाईल फोन आणि विनानोंदणीची मोटारसायकल.
- अश्फाक असलम शेख याच्याकडून: ५० प्रतिबंधित गोळ्या आणि एक मोबाईल फोन.
कायदेशीर कारवाई
या प्रकरणी दोन्ही आरोपींविरुद्ध पोलीस ठाणे सदर बाजार येथे भारतीय न्याय संहिता (BNS) तसेच एनडीपीएस कायदा (NDPS Act 1985) आणि औषधी व सौंदर्य प्रसाधने कायदा १९४० मधील संबंधित कलमांन्वय गुन्हा दाखल करण्यात आला आहे. पुढील तपास सदर बाजार पोलीस ठाण्यामार्फत सुरू आहे.
पोलीस पथकाची कामगिरी
सदरची यशस्वी कारवाई पोलीस अधीक्षक तेघबीर सिंह संधू, अपर पोलीस अधीक्षक विक्रम साळी आणि उपविभागीय पोलीस अधिकारी अनंत कुलकर्णी यांच्या मार्गदर्शनाखाली, सदर बाजार पोलीस ठाण्याचे प्रभारी अधिकारी सपोनि सचिन इंगेवाड, अन्न औषध प्रशासन विभागाचे सहायक आयुक्त जीवन जाधव आणि अंमली पदार्थ विरोधी पथकातील पोलीस अंमलदार यांनी संयुक्तपणे पार पाडली आहे.
