जालना: अवघडराव सावंगी येथील कीर्तनकार ह.भ.प. दौलत सातपुते यांचे दुःखद निधन; पोलिसांकडून तपास सुरू!
देवानंद बोर्डे
जालना: अवघडराव सावंगी येथील कीर्तनकार ह.भ.प. दौलत सातपुते यांचे दुःखद निधन; पोलिसांकडून तपास सुरू!
पिंपळगाव रेणुकाई: भोकरदन तालुक्यातील अवघडराव सावंगी येथील पाताळेश्वर मंदिर परिसरातील मठात वास्तव्यास असलेले कीर्तनकार ह.भ.प. दौलत रामनाथ सातपुते (वय ४१, मूळ रा. मुसळगाव, ता. सिन्नर, जि. नाशिक) यांचा रविवारी सकाळी संशयास्पद परिस्थितीत मृत्यू झाल्याची घटना समोर आली आहे. शनिवारी रात्री गावातील कीर्तनाचा कार्यक्रम आटोपून ते मठात परतले होते. मात्र, रविवारी सकाळी ते खोलीत मृतावस्थेत आढळून आले. विशेष म्हणजे, घटनास्थळावर त्यांचा मोबाईल फोन आढळून न आल्याने या प्रकरणाचे गूढ अधिकच वाढले आहे.
रात्री कीर्तन झाले, सकाळी दुर्दैवी घटना उघडकीस
ह.भ.प. दौलत सातपुते हे मागील आठ ते दहा वर्षांपासून अवघडराव सावंगी येथील पाताळेश्वर मंदिर परिसरातील मठात राहून कीर्तन आणि समाजप्रबोधनाचे कार्य करत होते. आपल्या कीर्तनातून ते तरुणांना व्यसनमुक्ती, माता-पित्यांची सेवा आणि राष्ट्रभक्तीचे महत्त्व पटवून देत असत.
शनिवारी रात्री अवघडराव सावंगी येथे त्यांचा कीर्तनाचा कार्यक्रम पार पडला. रात्री सुमारे १० वाजेपर्यंत कीर्तन केल्यानंतर ते नेहमीप्रमाणे आपल्या मठातील खोलीत झोपण्यासाठी गेले. रविवारी सकाळी बराच वेळ होऊनही ते बाहेर न आल्याने दर्शनासाठी आलेल्या भाविकांनी त्यांचा शोध घेतला. खोलीत पाहणी केली असता ते संशयास्पदरीत्या मृतावस्थेत आढळून आले. सकाळी १० वाजेच्या सुमारास ही घटना उघडकीस आल्यानंतर परिसरात मोठी खळबळ उडाली.
मोबाईल फोन गायब असल्याने तपासापुढे आव्हान
या घटनेतील सर्वात महत्त्वाची बाब म्हणजे महाराजांचा मोबाईल फोन घटनास्थळी मिळून आलेला नाही. रात्री कीर्तन संपवून मठात परतल्यानंतर सकाळी ही दुर्दैवी घटना घडणे आणि त्यांचा मोबाईल गायब असणे, यामुळे अनेक प्रश्न उपस्थित होत आहेत. मृत्यूपूर्वी त्यांचा कोणाशी संपर्क झाला होता का? आणि मोबाईल फोन नेमका कोठे गेला? या दिशेने आता पोलीस तपास करत आहेत.
फॉरेन्सिक पथकाकडून घटनास्थळाची पाहणी
घटनेची माहिती मिळताच पारध पोलीस ठाण्याचे सहायक पोलीस निरीक्षक सचिन खामगळ यांनी पथकासह घटनास्थळी धाव घेतली. घटनेचे गांभीर्य लक्षात घेऊन विधिविज्ञान प्रयोगशाळेच्या (फॉरेन्सिक) पथकालाही पाचारण करण्यात आले. पथकाने घटनास्थळाची बारकाईने पाहणी करून आवश्यक तांत्रिक पुरावे संकलित केले आहेत. शवविच्छेदन अहवाल आणि तांत्रिक तपासातूनच मृत्यूचे नेमके कारण स्पष्ट होईल, असे पोलिसांकडून सांगण्यात आले आहे.
हजारो भाविकांच्या उपस्थितीत शोकाकुल वातावरणात अंत्यसंस्कार
पोलिसांनी पंचनामा केल्यानंतर पार्थिव शवविच्छेदनासाठी वालसावंगी येथील प्राथमिक आरोग्य केंद्रात पाठवले. शवविच्छेदन प्रक्रियेनंतर पार्थिव अवघडराव सावंगी येथे आणण्यात आले. यावेळी लाडक्या महाराजांना अखेरचा निरोप देण्यासाठी हजारो भाविकांनी मोठी गर्दी केली होती. अत्यंत शोकाकुल वातावरणात त्यांच्या पार्थिवावर अंत्यसंस्कार करण्यात आले.
कीर्तनाच्या माध्यमातून समाजाला योग्य दिशा देणाऱ्या महाराजांच्या अचानक जाण्याने पंचक्रोशीत हळहळ व्यक्त होत असून, पारध पोलीस या प्रकरणाचा पुढील तपास करत आहेत.
