जालना: समृद्धी महामार्गावरील लोखंडी अँगल चोरणारी टोळी चंदनझिरा पोलिसांच्या जाळ्यात; ५.५३ लाखांचा मुद्देमाल जप्त

जालना: समृद्धी महामार्गावरील लोखंडी अँगल चोरणारी टोळी चंदनझिरा पोलिसांच्या जाळ्यात; ५.५३ लाखांचा मुद्देमाल जप्त

​जालना (ब्युरो रिपोर्ट): समृद्धी महामार्गावर अपघातांना निमंत्रण देणाऱ्या आणि महामार्गाच्या सुरक्षेसाठी लावलेली संरक्षण जाळी तसेच लोखंडी अँगल चोरणाऱ्या टोळीचा जालना पोलिसांनी पर्दाफाश केला आहे. चंदनझिरा पोलिसांनी पाठलाग करून तीन आरोपीतांना ताब्यात घेतले असून, त्यांच्याकडून चोरीचा माल आणि वाहतुकीसाठी वापरलेले वाहन असा एकूण ५ लाख ५३ हजार रुपयांचा मुद्देमाल जप्त केला आहे.

​गस्तीदरम्यान पोलिसांची सतर्कता

​२८ फेब्रुवारी २०२६ रोजी रात्री उशिरा चंदनझिरा पोलीस ठाण्याचे पथक नागेवाडी टोलनाका परिसरात गस्त घालत होते. यावेळी पोलिसांना पाहून एक पिकअप वाहन (MH 20 GC 0415) वेगाने छत्रपती संभाजीनगरच्या दिशेने पळून जाताना दिसले. संशय आल्याने पोलिसांनी सदर वाहनाचा पाठलाग केला. पोलिसांना जवळ येताना पाहून चालकाने गाडी रस्त्याच्या कडेला उभी केली आणि तिघांनी अंधाराचा फायदा घेऊन पळ काढण्याचा प्रयत्न केला.

​पाठलाग करून आरोपीतांना ठोकल्या बेड्या

​पोलिसांनी मोठ्या शिताफीने पाठलाग करून इकरार खान मुक्तार खान आणि विलास भाऊलाल चुंडीयाल (दोघेही रा. दुसरबीड, ता. सिंदखेडराजा) यांना ताब्यात घेतले. मात्र, वाहन चालक देवानंद शंकर डोईफोडे अंधारात पळून जाण्यात यशस्वी झाला. पिकअपची झडती घेतली असता, त्यात सुमारे एक टन वजनाचे लोखंडी अँगल, जाळी आणि लोखंड कापण्यासाठी लागणारे तीन कैची कटर मिळून आले.

​समृद्धी महामार्गावरील चोरीची कबुली

​सुरुवातीला उडवाउडवीची उत्तरे देणाऱ्या आरोपींना पोलिसांनी आपला ‘खाक्या’ दाखवताच त्यांनी गुन्ह्याची कबुली दिली. हा माल सिंदखेड राजा ते किनगाव राजा दरम्यान समृद्धी महामार्गावरून चोरी केल्याचे त्यांनी मान्य केले. यापूर्वीही त्यांनी अशाच प्रकारे चोरी करून माल विक्री केल्याची माहिती समोर आली आहे. या प्रकरणी पोलीस हवालदार कृष्णा तंगे यांच्या फिर्यादीवरून गुन्हा दाखल करण्यात आला आहे.

​अपघातांचा धोका वाढवणारी चोरी

​समृद्धी महामार्गावर वन्य प्राण्यांनी किंवा जनावरांनी प्रवेश करू नये, यासाठी प्रशासनाने कोट्यवधी रुपये खर्च करून संरक्षण जाळी लावली आहे. या जाळ्या चोरल्यामुळे जनावरे महामार्गावर येऊन मोठ्या अपघातांची शक्यता निर्माण झाली होती. पोलिसांनी केलेल्या या कारवाईमुळे चोरीच्या मोठ्या साखळीचा तपास लागण्याची शक्यता आहे.

​सदर कारवाई पोलीस अधीक्षक अजयकुमार बन्सल, अपर पोलीस अधीक्षक आयुष नोपानी आणि उपविभागीय पोलीस अधिकारी अनंत कुलकर्णी यांच्या मार्गदर्शनाखाली पोलीस निरीक्षक बाळासाहेब पवार, पोउपनि स्कॉट आणि त्यांच्या पथकाने केली आहे.

​ब्युरो रिपोर्ट, D9 News – जालना

सत्यता, सडेतोडता आणि आपल्या हक्काचा आवाज!