चंदनझिरा पोलिसांची कारवाई; चाकूचा धाक दाखवून ट्रकचालकाला लुटणारी टोळी जेरबंद!

चंदनझिरा पोलिसांची कारवाई; चाकूचा धाक दाखवून ट्रकचालकाला लुटणारी टोळी जेरबंद!

​जालना (प्रतिनिधी) : जालना औद्योगिक वसाहतीमध्ये (MIDC) ट्रकचालकाला अडवून त्याच्या पोटाला चाकू लावत मारहाण करत मोबाईल, रोख रक्कम व परवाना जबरदस्तीने हिसकावून नेणाऱ्या अट्टल गुन्हेगारांच्या टोळीचा चंदनझिरा पोलिसांनी पर्दाफाश केला आहे. तांत्रिक तपास आणि गोपनीय माहितीच्या आधारे अवघ्या एका तासात दोन आरोपींना अटक करण्यात पोलिसांना यश आले असून, त्यांच्याकडून ५३,५०० रुपये किमतीचा मुद्देमाल व गुन्ह्यात वापरलेला चाकू जप्त करण्यात आला आहे.

​यवतमाळ जिल्ह्यातील सोनुर्ली, ता. केळापूर येथील प्रज्योत प्रमोद वाढई (वय २४, व्यवसाय ट्रकचालक) हे ७ नोव्हेंबर २०२६ रोजी सकाळी जालना एमआयडीसी परिसरातील कालिका पार्किंग येथे ट्रक उभा करून विश्रांती घेत होते. त्याच दिवशी सायंकाळी साडेसात वाजेच्या सुमारास ते जेवण करण्यासाठी जात असताना, पार्किंगच्या बाजूला मोटारसायकलवरून आलेल्या तीन अनोळखी व्यक्तींनी त्यांना अडविले. आरोपींनी चाकू काढून फिर्यादीच्या पोटाला लावला आणि चापटाबुक्क्यांनी मारहाण करून ओप्पो कंपनीचा मोबाईल, खिशातील रोख १३,५०० रुपये आणि वाहन चालविण्याचा परवाना बळजबरीने हिसकावून घेतला. तसेच घटनेबाबत कोणास सांगितल्यास जीवे मारण्याची धमकी देऊन आरोपी निघून गेले होते. फिर्यादीने ९ नोव्हेंबर २०२६ रोजी पोलीस ठाणे चंदनझिरा येथे येऊन फिर्याद नोंदवली.

​गुन्ह्याचे गांभीर्य लक्षात घेऊन पोलीस ठाणे चंदनझिराचे पोलीस निरीक्षक किरण बिडवे यांच्या नेतृत्वाखाली पथकाने तत्काळ तपास सुरू केला. तांत्रिक विश्लेषन आणि गोपनीय बातमीदारांच्या माहितीवरून अभिषेक ऊर्फ रावण प्रताप गवारे (वय २३) आणि पांडुरंग बाबासाहेब देठे (वय ३२, दोघे रा. साडेसावंगी, ता. अंबड, जि. जालना) यांनी हा गुन्हा केल्याचे निष्पन्न झाले. पोलिसांनी अवघ्या एका तासात दोन्ही आरोपींना अटक केली. त्यांच्याकडून ४०,००० रुपये किमतीची मोटारसायकल, १०,००० रुपये किमतीचा मोबाईल फोन आणि ३,५०० रुपये रोख असा एकूण ५३,५०० रुपयांचा मुद्देमाल जप्त करण्यात आला आहे.

​अटक करण्यात आलेला आरोपी अभिषेक ऊर्फ रावण गवारे व त्याचा साथीदार हे पोलीस रेकॉर्डवरील गुन्हेगार असून त्यांच्याविरुद्ध यापूर्वी जबरी चोरी, दरोडा व चोरीचे गंभीर गुन्हे दाखल आहेत. न्यायालयाने दोन्ही आरोपींना १२ नोव्हेंबर २०२६ पर्यंत पोलीस कोठडी मंजूर केली असून पोलीस त्या दिशेने अधिक तपास करत आहेत.

​ही कारवाई पोलीस अधीक्षक तेघबीरसिंह संधु, अपर पोलीस अधीक्षक डॉ. विक्रम साळी व उपविभागीय पोलीस अधिकारी अनंत कुलकर्णी यांच्या मार्गदर्शनाखाली पोलीस निरीक्षक किरण बिडवे, सफौ मनसुब वेताळ, पोलीस हेड कॉन्स्टेबल प्रशांत देशमुख, कृष्णा तंगे, राजेंद्र पवार, शिवाजी जमधडे व स्थागुशाचे पोहेकॉ सागर बावस्कर यांच्या पथकाने पार पाडली.