सावंगी अवघडराव येथील महंतांच्या निधनाचे गूढ उकलणार? तांत्रिक तपासातून ‘ती’ माहिती समोर येणार; API सचिन खामगळ यांची मोठी भूमिका
By तेजराव दांडगे

सावंगी अवघडराव येथील महंतांच्या निधनाचे गूढ उकलणार? तांत्रिक तपासातून ‘ती’ माहिती समोर येणार; API सचिन खामगळ यांची मोठी भूमिका
पारध, (प्रतिनिधी) | १९ नोव्हेंबर २०२६: भोकरदन तालुक्यातील सावंगी अवघडराव येथील श्री पाताळेश्वर महादेव मंदिराचे महंत हरिभक्त परायण देवेंद्र चैतन्य स्वामी यांच्या अकस्मात निधनाने संपूर्ण परिसरात हळहळ व्यक्त होत आहे. १५ नोव्हेंबर २०२६ रोजी घडलेल्या या दुर्दैवी घटनेमागे नेमके काय दडले आहे, याबाबत ग्रामस्थांमध्ये आणि भाविकांमध्ये मोठी उत्सुकता व विविध चर्चांना उधाण आले आहे. या प्रकरणाची सखोल चौकशी करून सत्य समोर आणावे, अशी मागणी पत्रकार रवी लोखंडे यांनी केली आहे; तर दुसरीकडे पारध पोलीस ठाण्याचे सहाय्यक पोलीस निरीक्षक सचिन खामगळ यांनी तांत्रिक पुराव्यांच्या आधारे तपासाची चक्रे वेगाने फिरवत सर्व चर्चांवर पोलिसांची स्पष्ट भूमिका मांडली आहे.
सखोल चौकशी करून सत्य समोर आणावे – पत्रकार रवी लोखंडे
१५ नोव्हेंबर रोजी सकाळी ६ वाजेच्या सुमारास देवेंद्र चैतन्य स्वामी हे त्यांच्या निवासस्थानी मृत अवस्थेत आढळून आले होते. या घटनेवर आपली तीव्र भावना व्यक्त करताना पत्रकार रवी लोखंडे म्हणाले की, “पारध, सावंगी अवघडराव आणि पिंपळगाव रेणुका परिसरातील भाविकांसाठी हा अत्यंत धक्कादायक दिवस आहे. जे स्वामीजी आपल्या कथा, कीर्तन आणि प्रवचनातून समाजाला जीवन जगण्याची कला शिकवत होते, ते असे टोकाचे पाऊल उचलतील ही कल्पनाच मनाला पटणारी नाही. या घटनेमागे नक्कीच काहीतरी मोठे गूढ लपलेले असावे. त्यामुळे या संपूर्ण प्रकरणाची सखोल चौकशी करून त्यामागे नेमके काय कारण आहे, याचा पोलिसांनी तात्काळ उलगडा करावा,” अशी आग्रही मागणी त्यांनी केली आहे.
API सचिन खामगळ यांच्याकडून तपासाची दिशा स्पष्ट; बारवमधून मोबाईल हस्तगत
परिसरात सुरू असलेल्या विविध चर्चांवर पारध पोलीस ठाण्याचे सहाय्यक पोलीस निरीक्षक सचिन खामगळ यांनी अधिकृत स्पष्टीकरण देत तपासाची संपूर्ण माहिती समोर ठेवली आहे. घटनेची माहिती मिळताच पोलिसांनी तात्काळ घटनास्थळी धाव घेत सकाळी मंदिरात झाडलोट करणाऱ्या महिला व इतर प्रत्यक्षदर्शींचे जबाब नोंदवले आहेत. प्राथमिक तपासात खोलीला आतून कडी लावलेली असल्याचे समोर आले आहे. तसेच ‘ई-साक्ष’ (e-Sakshya) प्रणालीद्वारे सर्वांसमक्ष इन-कॅमेरा पंचनामे करण्यात आले असून, वैद्यकीय व पोस्टमॉर्टम अहवालही पोलिसांना प्राप्त झाला आहे.
दरम्यान, महंतांचा मोबाईल सापडत नसल्याने अनेक शंका उपस्थित केल्या जात होत्या. यावर पोलिसांनी तात्काळ शोधमोहीम राबवून परिसरातील एका बारवमधून (विहिरीतून) पंचनामा करून तो मोबाईल हस्तगत केला आहे. या मोबाईलमधील शेवटचा संवाद कोणाशी झाला आणि त्यात नेमके काय दडले आहे, हे शोधण्यासाठी हा मोबाईल पुढील तांत्रिक विश्लेषणासाठी फॉरेन्सिक लॅबकडे पाठवण्यात आला आहे.
कोणत्याही अफवांवर विश्वास न ठेवता सहकार्य करण्याचे आवाहन
या दुर्दैवी घटनेमागील नेमके कारण शोधणे हेच सध्या पोलिसांचे मुख्य लक्ष्य असल्याचे API सचिन खामगळ यांनी स्पष्ट केले आहे. मोबाईलचा फॉरेन्सिक अहवाल आणि कॉल रेकॉर्ड समोर आल्यानंतरच या गूढाचा पूर्ण उलगडा होणार आहे. महंतांच्या सान्निध्यात असलेल्या कोणत्याही व्यक्तीला या घटनेबाबत काही महत्त्वाची माहिती असल्यास त्यांनी न घाबरता पोलिसांना कळवावे, माहिती देणाऱ्याचे नाव पूर्णपणे गोपनीय ठेवले जाईल, असे आवाहनही पारध पोलिसांकडून करण्यात आले आहे.



