धामणा धरणातील अवैध पाणी उपशावर प्रशासनाची कडक कारवाई; पिण्याच्या पाण्यासाठी संयुक्त पथकाची रात्रंदिवस गस्त
By तेजराव दांडगे
धामणा धरणातील अवैध पाणी उपशावर प्रशासनाची कडक कारवाई; पिण्याच्या पाण्यासाठी संयुक्त पथकाची रात्रंदिवस गस्त
भोकरदन / पारध (प्रतिनिधी, D9 News): कमी पावसामुळे निर्माण झालेली संभाव्य दुष्काळी परिस्थिती आणि पाणीटंचाई लक्षात घेता, धामणा धरणातील पाण्याचा साठा केवळ पिण्याच्या पाण्यासाठी सुरक्षित ठेवण्याच्या उद्देशाने प्रशासनाने विशेष मोहीम हाती घेतली आहे. पाठबंधारे विभाग, महसूल, ग्रामविकास, महावितरण आणि पोलीस प्रशासनाच्या संयुक्त पथकाने धरणातून होणाऱ्या अवैध पाणी उपशावर १०० टक्के नियंत्रण मिळवण्यात यश मिळवले आहे.
संयुक्त पथकाची धडक कारवाई व रात्रीची गस्त
धामणा धरणातून होणारा अवैध पाणी उपसा रोखण्यासाठी पाटबंधारे विभागाचे कालवा निरीक्षक रवी पायघन यांच्यासह संयुक्त पथकातील तलाठी, मंडळ अधिकारी, ग्रामसेवक, महावितरणचे कर्मचारी आणि पोलीस कर्मचाऱ्यांनी धडक कारवाई केली आहे. परिसरातील नागरिकांना पाण्याचे महत्त्व पटवून देत व नियमांचे गांभीर्य लक्षात आणून दिल्याने अनधिकृत मोटारी व पाणी उपशावर पूर्णपणे वेसण घालण्यात आली आहे. याशिवाय, रात्रीच्या वेळी होणारी संभाव्य पाणीचोरी रोखण्यासाठी प्रशासकीय पथकाकडून नियमित गस्त व पेट्रोलिंग सुरू करण्यात आले आहे.
‘पिण्याचे पाणी हेच पहिले प्राधान्य’ – कालवा निरीक्षक रवी पायघन
या मोहिमेबाबत D9 News शी बोलताना पाटबंधारे विभागाचे कालवा निरीक्षक रवी पायघन यांनी सांगितले की, “सध्या धरणात मृत साठा (Dead Storage) शिल्लक असून, पुढील काळात सुमारे १२ ते १५ गावांच्या पिण्याच्या पाण्याचा प्रश्न अत्यंत महत्त्वाचा आहे. मानवी जीवन व पिण्याचे पाणी हेच आमचे प्रथम प्राधान्य आहे. सध्या प्रशासकीय संयुक्त कारवाईमुळे पाणी उपसा पूर्णपणे नियंत्रणात आहे. स्थानिक नागरिक व शेतकऱ्यांनीही परिस्थितीचे गांभीर्य ओळखून प्रशासनाला सहकार्य करावे.
पिण्याच्या पाण्यासाठी साठा आरक्षित
धरणातील उपलब्ध पाण्याचा साठा आगामी काळात जुई, भोकरदन व परिसरातील इतर गावांच्या नळ योजना तसेच टँकर भरण्यासाठी अत्यंत आवश्यक आहे. त्यामुळे बाष्पीभवन आणि पाण्याची गरज लक्षात घेता प्रशासनाने सतर्कता बाळगली असून ही मोहीम यापुढेही अशीच सातत्याने सुरू राहणार असल्याचे अधिकाऱ्यांनी स्पष्ट केले आहे.
