पारध: रहिवासी भागातील ‘आग्या मोहोळाचा’ धोका टळला; तज्ज्ञांच्या मदतीने सुरक्षितरीत्या मोहोळ हटवले
By तेजराव दांडगे
पारध: रहिवासी भागातील ‘आग्या मोहोळाचा’ धोका टळला; तज्ज्ञांच्या मदतीने सुरक्षितरीत्या मोहोळ हटवले
पारध (प्रतिनिधी): गेल्या काही दिवसांपासून पारध येथील एका निवासी इमारतीवर वास्तव्यास असलेल्या आग्या मोहोळाचा (मधमाश्यांचा) धोका अखेर टळला आहे. आज रात्री ७ ते ८ वाजेच्या दरम्यान घरमालकाने विशेष तज्ज्ञ व्यक्तीला पाचारण करून हे मोहोळ सुरक्षितरीत्या उठवले.
विद्यार्थी आणि नागरिकांमध्ये होती भीती
शाळा परिसरात आणि मुख्य रस्त्याला लागून असलेल्या या इमारतीवर आग्या मोहोळ असल्याने विद्यार्थ्यांच्या व पालकांच्या मनात मोठी भीती होती. दिवसा मधमाश्यांच्या वावरामुळे कोणत्याही क्षणी दुर्घटना घडण्याची शक्यता वर्तवण्यात येत होती. यापूर्वीच पालकांनी सतर्क राहण्याचे आवाहन करण्यात आले होते.
रात्रीच्या वेळी राबवली मोहीम
मधमाश्यांचा धोका ओळखून घरमालकाने रात्रीच्या वेळी या क्षेत्रातील तज्ज्ञ व्यक्तीला बोलावले. आग्या मोहोळ उठवण्याचे काम अत्यंत जोखमीचे असते, परंतु तज्ज्ञाने कोणत्याही जीवीतहानीशिवाय आणि इजा न होता हे मोहोळ यशस्वीरीत्या हटवले. यावेळी मोहोळाचा मोठा भाग सुरक्षितरीत्या खाली उतरवण्यात आला.
नागरिकांनी सोडला सुटकेचा निश्वास
मोहोळ हटवल्याची बातमी समजताच परिसरातील नागरिक आणि विशेषतः पालकांनी सुटकेचा निश्वास सोडला आहे. आता शाळेत जाणाऱ्या पाल्यांचा आणि रस्त्याने जाणाऱ्या पादचाऱ्यांचा मधमाश्यांच्या दंशाचा धोका पूर्णपणे संपला आहे.
