शिक्षण क्षेत्राला काळिमा! मेहकर तालुक्यात शिक्षकाचे विद्यार्थिनींसोबत अश्लील कृत्य; संतप्त ग्रामस्थांनी चोप दिला
By तेजराव दांडगे
शिक्षण क्षेत्राला काळिमा! मेहकर तालुक्यात शिक्षकाचे विद्यार्थिनींसोबत अश्लील कृत्य; संतप्त ग्रामस्थांनी चोप दिला
बुलढाणा/मेहकर (प्रतिनिधी): तालुक्यातील लोणी गवळी येथील जिल्हा परिषद शाळेत एका ५८ वर्षीय शिक्षकाने तिसऱ्या वर्गात शिकणाऱ्या चिमुकल्या विद्यार्थिनींसोबत अश्लील चाळे केल्याची धक्कादायक घटना समोर आली आहे. या प्रकारामुळे परिसरात प्रचंड संताप व्यक्त होत असून, संतप्त पालकांनी संबंधित शिक्षकाला शाळेतच चांगलाच चोप दिला.
वर्गातच घडत होता किळसवाणा प्रकार
मिळालेल्या माहितीनुसार, महादेव आत्माराम मानतोडे (वय ५८) असे या शिक्षकाचे नाव असून तो सेवानिवृत्तीच्या उंबरठ्यावर आहे. मागील काही दिवसांपासून तो वर्गातील विद्यार्थिनींसोबत गैरवर्तन करत होता. याबद्दल कोणाला सांगितल्यास जीवे मारण्याची धमकी तो देत असे. मात्र, या नराधमाच्या त्रासाला कंटाळून मुलींनी अखेर बुधवारी आपल्या पालकांकडे धाव घेत सर्व हकीकत सांगितली.
ग्रामस्थांचा संताप आणि पोलिसांचा हस्तक्षेप
मुलींनी माहिती देताच संतप्त पालकांनी आणि ग्रामस्थांनी गुरुवारी सकाळी १० वाजता शाळा गाठली. यावेळी संतप्त जमावाने या विकृत शिक्षकाची चांगलीच धुलाई केली. घटनेची माहिती मिळताच डोणगाव पोलीस स्टेशनचे ठाणेदार अमरनाथ नागरे आणि उपविभागीय पोलीस अधिकारी संतोष खाडे तातडीने फौजफाट्यासह घटनास्थळी दाखल झाले. परिस्थितीचे गांभीर्य ओळखून गावात राखीव पोलीस दलही तैनात करण्यात आले होते.
गुन्हा दाखल करण्याची प्रक्रिया सुरू
पोलिसांनी आरोपीत शिक्षकाला ताब्यात घेऊन डोणगाव पोलीस ठाण्यात नेले आहे. उपविभागीय पोलीस अधिकारी संतोष खाडे यांनी संतप्त ग्रामस्थांची समजूत काढली असून, दोषीवर कडक कायदेशीर कारवाई करण्याचे आश्वासन दिले आहे. याप्रकरणी संबंधित पीडित मुलींच्या पालकांच्या तक्रारीवरून गुन्हा दाखल करण्याची प्रक्रिया रात्री उशिरापर्यंत सुरू होती.
