प्रेषित हजरत मोहम्मद पैगंबरांचे जीवन प्रत्येक व्यक्तीसाठी मोलाचे; पारध येथे ईद-ए-मिलाद निमित्त भव्य रक्तदान शिबीर संपन्न!
By तेजराव दांडगे
प्रेषित हजरत मोहम्मद पैगंबरांचे जीवन प्रत्येक व्यक्तीसाठी मोलाचे; पारध येथे ईद-ए-मिलाद निमित्त भव्य रक्तदान शिबीर संपन्न!
पारध (प्रतिनिधी: तेजराव दांडगे ): भोकरदन तालुक्यातील पारध येथे जश्ने ईद-ए-मिलाद-उन-नबी निमित्ताने सामाजिक बांधिलकी जोपासत स्थानिक युवकांतर्फे (दि. २६) मोहम्मदिया शादी हॉल येथे भव्य रक्तदान शिबिराचे आयोजन करण्यात आले होते. या शिबिरात तरुणांनी मोठ्या उत्साहात सहभागी होत रक्तदान केले.
कार्यक्रमाचे उद्घाटन पारध पोलिस ठाण्याचे सहाय्यक निरीक्षक संतोष माने यांच्या हस्ते करण्यात आले. या प्रसंगी मुस्लिम पंच कमिटीचे अध्यक्ष अजहर पठाण, अजीज शेख, माजी जि. प. सभापती मनीष श्रीवास्तव, माजी पं. स. सभापती परमेश्वर लोखंडे, प्रा. संग्राम देशमुख, हाफिज खलील, कारी सादिक, शेख आबेद, शेख नसीर, शेख लतीफ, शेख साबेर, हाफिज शाहरुख, समी खान, बाबुखान यांच्यासह गावातील मान्यवर व नागरिक मोठ्या संख्येने उपस्थित होते.
या शिबिरात शेकडो युवकांसह वयोवृद्धांनीही रक्तदान करून सहभाग नोंदवला, तर विद्यार्थ्यांचा उत्स्फूर्त सहभाग विशेष उल्लेखनीय ठरला. ‘रक्तदान हेच श्रेष्ठदान’ या संदेशाने प्रेरित होऊन अनेकांनी या सामाजिक कार्यात पुढाकार घेतला.
यावेळी बोलताना जामा मस्जिद पारधचे इमाम मौलाना खलील यांनी सांगितले की, “प्रेषित मोहम्मद साहेबांचे जीवन जगातील प्रत्येक व्यक्तीसाठी मोलाचे आहे. रक्तदानामुळे अनेकांचे प्राण वाचतात, म्हणून प्रत्येकाने वर्षातून एकदा तरी रक्तदान करण्याचा संकल्प करावा.”
शिबिरात सर्व रक्तदात्यांचा सत्कार करून त्यांना प्रमाणपत्रे देण्यात आली, तसेच उपस्थितांसाठी अल्पोपहाराचेही आयोजन करण्यात आले होते. या उपक्रमादरम्यान पत्रकार रवींद्र लोखंडे, शकील अहमद, गजानन देशमुख, रमेश जाधव, रामसिंग ठाकूर, समाधान तेलंग्रे आणि सागर देशमुख यांची प्रमुख उपस्थिती होती. या उपक्रमामुळे पारध परिसरात सामाजिक ऐक्य व बंधुता अधिक दृढ झाल्याचे चित्र दिसून आले.
