गॅस न घेताच ‘सबसिडी’ जमा, पण सिलेंडर गायब; जुनना येथील ‘नरोटे गॅस एजन्सी’च्या कारभारावर प्रश्नचिन्ह!
नरोटे गॅस एजन्सीचा मोठा तांत्रिक घोटाळा! विना बुकिंग आणि विना DAC कोड 'डिलिव्हरी' यशस्वी?
गॅस न घेताच ‘सबसिडी’ जमा, पण सिलेंडर गायब; जुनना येथील ‘नरोटे गॅस एजन्सी’च्या कारभारावर प्रश्नचिन्ह!
जालना (प्रतिनिधी): डिजिटल इंडियामध्ये ग्राहकांच्या सुरक्षेसाठी असलेला DAC (डिलिव्हरी ऑथेंटिकेशन कोड) जुनना (ता. भोकरदन) परिसरात कुचकामी ठरत असल्याचे धक्कादायक वास्तव समोर आले आहे. एका ग्राहकाने गॅस बुकिंग न करता आणि ओटीपी न देताही सिस्टिममध्ये ‘डिलिव्हरी यशस्वी’ दाखवून चक्क अनुदान (सबसिडी) लाटण्याचा प्रकार उघडकीस आला आहे. ही घटना जुनना येथील नरोटे गॅस एजन्सीच्या संदर्भात समोर आली आहे.
नेमका प्रकार काय?
पारध येथील सजग ग्राहक तेजराव दांडगे यांच्याकडे गॅस शिल्लक असल्याने त्यांनी कोणतीही ऑर्डर दिली नव्हती. मात्र, दि. १८ एप्रिल २०२६ रोजी त्यांच्या मोबाईलवर ‘गॅस यशस्वीरित्या घरपोच झाला’ असा अधिकृत संदेश प्राप्त झाला. विशेष म्हणजे, गॅस वितरणाची प्रक्रिया पूर्ण करण्यासाठी आवश्यक असलेला ६ अंकी DAC कोड ग्राहकाच्या मोबाईलवरच सुरक्षित असताना, सिस्टिममध्ये ही डिलिव्हरी पूर्ण कशी झाली? हा मोठा तांत्रिक प्रश्न आता उपस्थित होत आहे.
ऑपरेटरकडून ‘तारीख पे तारीख’:
या प्रकारानंतर ग्राहकाने संबंधित जालना जिल्ह्यातील भोकरदन तालुक्यातील जुनना येथील नरोटे गॅस एजेंसीच्या ऑपरेटरशी संपर्क साधला असता, गेल्या आठ दिवसांपासून केवळ “उद्या सिलेंडर देतो” असे सांगून बोळवण केली जात आहे. कागदोपत्री डिलिव्हरी दाखवून प्रत्यक्ष सिलेंडर गायब केल्याने, हा एखाद्या मोठ्या तांत्रिक गैरव्यवहाराचा भाग आहे का, असा संशय व्यक्त केला जात आहे.
अनुदान जमा, गॅस कोठे?
या सर्व गोंधळात ग्राहकाच्या बँक खात्यात अनुदान तर जमा झाले आहे, पण हातामध्ये गॅस सिलेंडर मात्र नाही. तांत्रिक त्रुटीच्या नावाखाली सर्वसामान्य ग्राहकांची दिशाभूल करणाऱ्या या प्रकाराची तक्रार आता कॉल सेंटर वर करण्यात आली असून लवकरच इंडेन गॅसच्या वरिष्ठ अधिकाऱ्यांकडे लेखी तक्रार करण्यात येणार असल्याचे ग्राहकाने सांगितले आहे.
