चार महिन्यांपूर्वी केलेल्या डागडुजीचा फज्जा उडाला; पारध ते पारध खुर्द मार्गावर प्रवाशांचा जीव मुठीत!

​चार महिन्यांपूर्वी केलेल्या डागडुजीचा फज्जा उडाला; पारध ते पारध खुर्द मार्गावर प्रवाशांचा जीव मुठीत!

पारध (प्रतिनिधी): भोकरदन तालुक्यातील पारध बुद्रुक ते पारध खुर्द या अत्यंत महत्त्वाच्या रस्त्याची दयनीय अवस्था झाली असून, रस्त्यावरील खडी पूर्णपणे उखडली आहे. या उखडलेल्या खडीवरून जीव मुठीत धरून वाहने चालवावी लागत असल्याने वाहनधारकांना नाहक त्रास सहन करावा लागत आहे. विशेष म्हणजे, अवघ्या चार महिन्यांपूर्वी या रस्त्याची संबंधित विभागाकडून थातूरमातूर डागडुजी करण्यात आली होती; मात्र काही दिवसांतच रस्त्याची चाळण झाल्याने या कामाच्या दर्जाबद्दल तीव्र शंका उपस्थित होत आहे.

​पारध खुर्द आणि पराशर नगर येथील ग्रामस्थांचे बँक, पोलीस ठाणे, दवाखाना आणि इतर दैनंदिन कामांसाठी पारध बुद्रुक येथे येणे-जाणे असते. परंतु, रस्त्यावरील खड्डे आणि खडीमुळे दुचाकीस्वार, चारचाकी वाहनधारक तसेच पादचाऱ्यांचा प्रवास अत्यंत खडतर झाला आहे.

​विद्यार्थ्यांचा प्रवास बनला धोकादायक:

या मार्गावरून धावणाऱ्या स्कूल बसेस देखील खड्ड्यांमधून आणि उखडलेल्या खडीवरून झोके खात जात आहेत. विद्यार्थ्यांच्या सुरक्षेचा प्रश्न ऐरणीवर आला असून, एखादी दुर्घटना घडल्यास त्याला जबाबदार कोण, असा संतप्त सवाल संतप्त पालकांकडून विचारला जात आहे.

​माजी सैनिकांनाही फटका:

पारध खुर्द येथे अनेक माजी सैनिक, सेवानिवृत्त कर्मचारी व ज्येष्ठ नागरिक वास्तव्यास आहेत. त्यांना पेन्शन व शासकीय कामांसाठी पारध बुद्रुकला येताना या खराब रस्त्यामुळे मोठी कसरत करावी लागते. देशसेवा केलेल्या या ज्येष्ठ नागरिकांना मूलभूत सुविधांसाठीही संघर्ष करावा लागत असल्याचे चित्र आहे.

​प्रशासन कधी जागी होणार?

तात्पुरती मलमपट्टी न करता या रस्त्याचे काम आता कायमस्वरूपी आणि दर्जेदार करण्याची मागणी ग्रामस्थांकडून होत आहे. संबंधित विभागाने तातडीने याकडे लक्ष न दिल्यास तीव्र संताप व्यक्त होत आहे.