विशेष शोधवृत्त: जालन्यात वाळू दराचा भडका! ६०० रुपयांची वाळू ३००० पार; सामान्यांच्या घराचे स्वप्न ‘धुळीत’?
जालना / प्रतिनिधी
विशेष शोधवृत्त: जालन्यात वाळू दराचा भडका! ६०० रुपयांची वाळू ३००० पार; सामान्यांच्या घराचे स्वप्न ‘धुळीत’?
जालना (प्रतिनिधी): महाराष्ट्र शासनाने सर्वसामान्यांना स्वस्त दरात वाळू उपलब्ध करून देण्यासाठी ‘नवे वाळू धोरण’ जाहीर केले आणि डेपोवर ६०० रुपये प्रति ब्रास दर निश्चित केला. मात्र, भोकरदनसह ग्रामीण भागात चित्र अगदी उलटे दिसत आहे. प्रत्यक्षात वाळूचे दर सध्या ३००० रुपयांच्या वर, तर मुरुमाचे दर १००० रुपयांच्या पार पोहोचले आहेत. शासकीय दर आणि बाजारभाव यातील या प्रचंड तफावतीमुळे सर्वसामान्यांची मोठी आर्थिक लूट होत असून, हा जास्तीचा पैसा नेमका कोणाच्या खिशात जात आहे? असा संतप्त सवाल नागरिक विचारत आहेत.
नेमके गणित बिघडले कुठे?
शासकीय नियमानुसार वाळू डेपोतून रितसर पावती फाडून वाळू नेणे अपेक्षित आहे. मात्र, अनेक ठिकाणी अवैध उपसा आणि वाहतुकीचा खर्च सांगून ग्राहकांकडून अव्वाच्या सव्वा दर आकारले जात आहेत. वाळूचा मूळ खर्च, डिझेल आणि वाटेत होणारा ‘इतर’ खर्च यांची गोळाबेरीज करून तो भार शेवटी सामान्य ग्राहकाच्या डोक्यावर मारला जात आहे. मुरुमाची रॉयल्टी भरलेली असतानाही, मुरुमाचे दर १००० ते १२०० रुपये प्रति ब्रासपर्यंत पोहोचल्याने बांधकाम व्यावसायिक आणि घरमालक हवालदिल झाले आहेत.
घरकुल लाभार्थी संकटात
पंतप्रधान आवास योजना किंवा इतर शासकीय घरकुल योजनेच्या लाभार्थ्यांना वाळू मोफत किंवा सवलतीत मिळण्याची तरतूद कागदावर आहे. मात्र, प्रत्यक्षात वाळू मिळवण्यासाठी त्यांनाही याच वाढीव दराचा सामना करावा लागत आहे. शासनाकडून मिळणारे तुटपुंजे अनुदान आणि वाळू-मुरुमाचे गगनाला भिडलेले भाव यामुळे अनेक गरीब कुटुंबांनी आपल्या घराचे बांधकाम अर्धवट सोडले आहे.
प्रशासनाचा वचक संपला का?
वाळूचे दर नियंत्रणात ठेवणे आणि अवैध उपसा रोखणे ही महसूल विभागाची जबाबदारी आहे. मग उघडपणे ३००० रुपयांहून अधिक दराने वाळू विकली जात असताना प्रशासन गप्प का? वाढीव दरांच्या माध्यमातून होणारी ही ‘आर्थिक साखळी’ नेमकी कोणापर्यंत पोहोचते, याची सखोल चौकशी होणे गरजेचे आहे.
— जालना प्रतिनिधी, D9 News मराठी
”या संदर्भात आम्ही संबंधित विभागाच्या अधिकाऱ्यांची प्रतिक्रिया घेण्याचा प्रयत्न केला असता, ती उपलब्ध होऊ शकली नाही. त्यांची बाजू समजताच ती प्रसिद्ध केली जाईल.”
