धावडा येथे जुगार अड्ड्यावर पोलिसांचा छापा; ९ जणांवर गुन्हा दाखल, १ लाख ९६ हजारांचा मुद्देमाल जप्त
By तेजराव दांडगे
धावडा येथे जुगार अड्ड्यावर पोलिसांचा छापा; ९ जणांवर गुन्हा दाखल, १ लाख ९६ हजारांचा मुद्देमाल जप्त
पारध बु. (विशेष प्रतिनिधी): भोकरदन तालुक्यातील मौजे धावडा येथे कोळी समाज मंगल कार्यालय आवारात सुरू असलेल्या जुगार अड्ड्यावर पारध पोलिसांनी धाड टाकून धडक कारवाई केली आहे. या कारवाईत पोलिसांनी नगदी रकमेसह ३ मोटारसायकली असा एकूण १ लाख ९६ हजार ४७० रुपयांचा मुद्देमाल जप्त केला असून, ९ जणांविरोधात पारध पोलीस ठाण्यात गुन्हा दाखल करण्यात आला आहे.
गुप्त माहितीच्या आधारे धाड
उपविभागीय पोलीस अधिकारी (SDPO) काटेकर साहेब यांच्या मार्गदर्शनाखाली पारध पोलीस ठाण्याचे सहाय्यक पोलीस निरीक्षक (API) संतोष माने व त्यांच्या पथकाला धावडा येथील कोळी समाज मंगल कार्यालयाच्या आवारात ‘जन्ना मन्ना’ नावाचा पत्त्यांचा जुगार खेळला जात असल्याची गुप्त बातमी मिळाली होती. या गोपनीय माहितीच्या आधारे पोलिसांनी पथकासह सदर ठिकाणी अचानक छापा मारला.
५ जण ताब्यात, ४ जण फरार
पोलीस पथकाने छापा टाकला असता, त्या ठिकाणी काही इसम बेकायदेशीरपणे जुगार खेळताना रंगेहात मिळून आले.
कारवाईदरम्यान ताब्यात घेण्यात आलेले आरोपीत:
१) उमेश एकनाथ गवळी
२) विशाल गणेश फुसे
३) मुकेश एकनाथ गवळी
४) सय्यद साबीर सय्यद जहुर
५) गणेश भगवान गवळी
घटनास्थळावरून फरार झालेले आरोपीत:
६) सोमीनाथ प्रभू गवळी
७) अमोल तेजराव गवळी
८) गणेश रमेश गवळी
९) विनोद सुपडा गवळी
१ लाख ९६ हजारांचा मुद्देमाल जप्त
पोलीस कारवाईदरम्यान आरोपीतांच्या ताब्यातून ६,४७० रुपये रोख रक्कम आणि तीन मोटारसायकली असा एकूण १,९६,४७० रुपयांचा मुद्देमाल जप्त करण्यात आला आहे. याप्रकरणी पोलीस अंमलदार संतोष जाधव यांच्या तक्रारीवरून सर्व आरोपीतांविरोधात पारध पोलीस ठाण्यात जुगार कायद्यांतर्गत गुन्हा नोंदवण्यात आला आहे.
कारवाई करणारे पोलीस पथक
सदर यशस्वी कारवाई उपविभागीय पोलीस अधिकारी काटेकर साहेब यांच्या मार्गदर्शनाखाली सपोनि संतोष माने, पोउपनि नेमाने, सहाय्यक फौजदार जायभाये आणि पोलीस अंमलदार संतोष जाधव यांच्या पथकाने केली आहे. अवैध धंदे करणाऱ्यांविरोधात पारध पोलिसांची ही कठोर कारवाई पुढेही सुरूच राहील, असा इशारा प्रशासनाने दिला आहे.
