पारध: जुन्या प्लॉटिंगच्या वादातून मोहळाई चौफुलीवर तरुणाला ‘फायटर’ने मारहाण; एकाच कुटुंबातील ६ जणांवर गुन्हा दाखल
By तेजराव दांडगे
पारध: जुन्या प्लॉटिंगच्या वादातून मोहळाई चौफुलीवर तरुणाला ‘फायटर’ने मारहाण; एकाच कुटुंबातील ६ जणांवर गुन्हा दाखल
पारध (प्रतिनिधी): भोकरदन तालुक्यातील मोहळाई चौफुलीवर जुन्या प्लॉटिंगच्या वादातून एका तरुणाच्या कारला अडवून त्याला आणि त्याच्या कुटुंबाला बेदम मारहाण केल्याची धक्कादायक घटना समोर आली आहे. या प्रकरणी पीडित तरुणाच्या तक्रारीवरून पारध पोलीस ठाण्यात छत्रपती संभाजीनगर येथील ६ जणांविरुद्ध भारतीय न्याय संहितेच्या (BNS) विविध गंभीर कलमांन्वये गुन्हा दाखल करण्यात आला आहे.
धावत्या कारला अडवून मारहाण:
फिर्यादी ज्ञानेश्वर आनंदा वाघ (वय ३५ वर्ष, व्यवसाय: शेती, रा. मोहळाई, ता. भोकरदन) यांनी दिलेल्या तक्रारीनुसार, २२ मे २०२६ रोजी दुपारी १:०० वाजेच्या सुमारास ते आपल्या कुटुंबासह स्विफ्ट कारने जात होते. कार रेलगाव, कोसगाव, अवघडराव सावंगी आणि मोहळाई चौफुली परिसरात आली असता, संशयित आरोपीतांनी गैरकायद्याची मंडळी जमवून त्यांची कार रस्त्यात अडवली.
जुन्या वादातून हल्ला:
कार अडवल्यानंतर संशयित आरोपीतांनी जुन्या प्लॉटिंगच्या कारणावरून वाद उकरून काढला. हा वाद विकोपाला गेल्यानंतर संशयित आरोपी क्रमांक १ याने फिर्यादी ज्ञानेश्वर वाघ यांचे केस धरून त्यांना कारमधून खाली ओढले आणि हातातील लोखंडी फायटरने त्यांच्या डाव्या भुवयावर आणि डोक्यात जोराने प्रहार केला. या हल्ल्यात ज्ञानेश्वर यांचे डोके फुटून ते गंभीर जखमी झाले.
तसेच वाद सोडवण्यासाठी आलेल्या फिर्यादीच्या आईला, पत्नीला, पुतण्याला आणि त्याच्या पत्नीला देखील इतर संशयितांनी लाथाबुक्क्यांनी बेदम मारहाण करत शिवीगाळ केली व जिवे मारण्याची धमकी दिली.
संभाजीनगरच्या ६ जणांवर गुन्हा दाखल:
पीडित ज्ञानेश्वर वाघ यांच्या तक्रारीवरून पारध पोलिसांनी गुन्हा दाखल केला आहे. यामध्ये खालील संशयित आरोपीतांचा समावेश आहे:
१) रवी रजनी वाघ
२) योगेश भगवान पगारे
३) संदीप श्रीराम वाघ
४) अभिषेक दिलीप वाघ
५) रजनी दौलत वाघ
६) श्रीराम दौलत वाघ (सर्व रा. छत्रपती संभाजीनगर).
पारध पोलीस ठाण्याचे पोहेकॉ जी. डी. भुलेकर यांनी या गुन्ह्याची नोंद केली असून, सहाय्यक पोलीस निरीक्षकांच्या आदेशानुसार पोहेकॉ/४९८ पी. एन. सिनकर या प्रकरणाचा पुढील कायदेशीर तपास करत आहेत.
