महाराष्ट्रातील आतापर्यंतचा सर्वात मोठा दूध भेसळ पॅटर्न उघड; एफडीए आयुक्त तुकाराम मुंढे यांच्याकडून जालना जिल्ह्यातील ‘या’ डेअरीसह रॅकेटचा पर्दाफाश!
Maharashtra's biggest ever milk adulteration pattern exposed; FDA Commissioner Tukaram Mundhe exposes racket with 'this' dairy in Jalna district!
महाराष्ट्रातील आतापर्यंतचा सर्वात मोठा दूध भेसळ पॅटर्न उघड; एफडीए आयुक्त तुकाराम मुंढे यांच्याकडून जालना जिल्ह्यातील ‘या’ डेअरीसह रॅकेटचा पर्दाफाश!
मुंबई / जालना / भोकरदन: महाराष्ट्रात अन्न व औषध प्रशासन (FDA) आणि पोलिसांनी संयुक्तपणे एक अत्यंत मोठी आणि धडाकेबाज कारवाई केली आहे. राज्यात सुरू असलेल्या संघटित आणि रासायनिक दूध भेसळ रॅकेटचा पर्दाफाश करण्यात आला असून, यामध्ये जालना जिल्ह्यातील भोकरदन तालुक्यातील जळगाव सपकाळ येथील ‘मेसर्स मातोश्री दूध डेअरी’ चा समावेश असल्याची अधिकृत माहिती राज्याचे एफडीए आयुक्त तुकाराम मुंढे यांनी मुंबई येथील विशेष पत्रकार परिषदेत दिली.
गेल्या महिनाभरापासून सुरू असलेल्या या अत्यंत गोपनीय आणि ‘इंटेलिजन्स बेस्ड’ ऑपरेशनमुळे राज्यातील भेसळबहाद्दरांचे धाबे दणाणले आहेत. या कारवाईत जालना जिल्ह्यासह राज्यातील एकूण ७ जिल्ह्यांमध्ये या रॅकेटची पाळेमुळे पसरल्याचे समोर आले आहे.
आयुक्त तुकाराम मुंढे यांनी जाहीर केलेली अधिकृत नावे:
पत्रकार परिषदेत आयुक्त तुकाराम मुंढे यांनी कारवाई झालेल्या एकूण १३ संस्था/डेअरींची नावे जाहीर केली, ज्यामध्ये खालील प्रमुख नावांचा समावेश आहे:
१) मेसर्स मातोश्री दूध डेअरी: जळगाव सपकाळ, तालुका भोकरदन, जिल्हा जालना.
२) जय श्रीराम डेअरी फार्म: पिंपळगाव खडकी, तालुका आंबेगाव, जिल्हा पुणे.
३) सोनू उर्फ चैतन्य घोरपडे डेअरी: पिलीव, तालुका माळशिरस, जिल्हा सोलापूर.
४) नवकार डिस्ट्रीब्युटर्स: अवसरी बुद्रुक, मंचर, जिल्हा पुणे (मुख्य केंद्र).
शॅम्पू, डिटर्जंट आणि घातक केमिकलचा वापर; आरोग्याशी भयंकर खेळ!
एफडीएच्या तपासणीत समोर आलेली माहिती अत्यंत धक्कादायक आहे. हे रॅकेट दुधाचे प्रमाण आणि स्निग्धता (Fat) वाढवण्यासाठी मानवी शरीराला कमालीचे घातक असणारे रसायन वापरत होते. यामध्ये स्कीम मिल्क पावडर, व्हे परमिट पावडर, पाम तेल, शॅम्पू, डिटर्जंट पावडर आणि ‘इमल्सिफायर’ नावाचे इंडस्ट्रियल केमिकल (औद्योगिक रसायन) वापरले जात होते. या केमिकल्सचा वापर करून म्हैशीचे बनावट दूध अवघ्या ३० रुपये प्रति लिटर आणि गाईचे दूध १५ रुपये प्रति लिटर खर्चात तयार करून ते मूळ दुधात मिक्स केले जात होते.
मुख्य सूत्रधार आणि सप्लायर्स पोलिसांच्या ताब्यात
पुणे ग्रामीणचे एसपी संदीप सिंग गिल आणि एफडीएच्या संयुक्त पथकाने या रॅकेटचा मुख्य पुरवठादार सुशांत हिंगे आणि मुख्य सल्लागार (फॉर्म्युला मेकर) संदीप लोढा यांना मंचर (पुणे) येथून अटक केली आहे. याशिवाय, सोलापूरच्या अकलूज येथील ‘हेमंत कॉर्पोरेशन’ (मुख्य पावडर सप्लायर) आणि ठाण्यातील ‘संजोग एंटरप्रायझेस’ (केमिकल सप्लायर) यांचेही धागेदोरे या गुन्ह्यात समोर आले आहेत. एकूण २६ आरोपींपैकी १३ जणांना आतापर्यंत अटक करण्यात आली असून न्यायालयीन कोठडीत त्यांची कसून चौकशी सुरू आहे.
मोक्का आणि आजन्म कारावासाची तरतूद; १.४४ कोटींचा मुद्देमाल जप्त
आयुक्त तुकाराम मुंढे यांनी स्पष्ट केले की, हा थेट सार्वजनिक आरोग्याशी आणि लहान मुलांच्या जिवाशी खेळणारा संघटित गुन्हा (Organized Crime) आहे. त्यामुळे आरोपींवर भारतीय न्याय संहितेचे (BNS) कलम १११ (संघटित गुन्हेगारी), १२३ (विषप्रयोगाने दुखापत करणे) आणि अन्न सुरक्षा कायद्याचे कलम ५९ (असुरक्षित अन्न विक्री – ज्यात ७ वर्षे ते आजन्म कारावासाची तरतूद आहे) लावण्यात आले आहे. या कारवाईत १ कोटी ४४ लाख रुपयांपेक्षा जास्त किमतीचा मुद्देमाल जप्त करण्यात आला असून २० हजार लिटरपेक्षा जास्त विषारी दूध जागीच नष्ट करण्यात आले आहे. तसेच दोषी डेअरींचे परवाने तात्काळ निलंबित करण्यात आले आहेत.
या धडक कारवाईचा संपूर्ण अधिकृत व्हिडिओ पहा:
अन्न व औषध प्रशासनाने या रॅकेटचा पर्दाफाश कसा केला आणि आयुक्त तुकाराम मुंढे यांनी पत्रकार परिषदेत काय काय खुलासे केले, हे पाहण्यासाठी खालील अधिकृत यूट्यूब लिंकवर क्लिक करा:
