जालन्यात LCB ची कारवाई; सोलर प्लांटवरील कॉपर वायर चोरी व घरफोडी करणाऱ्या टोळीचा पर्दाफाश, ७ लाखांचा मुद्देमाल जप्त
By तेजराव दांडगे
जालन्यात LCB ची कारवाई; सोलर प्लांटवरील कॉपर वायर चोरी व घरफोडी करणाऱ्या टोळीचा पर्दाफाश, ७ लाखांचा मुद्देमाल जप्त
जालना | विशेष बातमीदार: जालना पोलीस अधीक्षक तेघबीर सिंह संधू यांच्या मार्गदर्शनाखाली स्थानिक गुन्हे शाखेने (LCB) एक मोठी कारवाई करत सोलर प्लांटवरील कॉपर वायर चोरी आणि घरफोडी प्रकरणातील ४ आरोपींना जेरबंद केले आहे. या धडक कारवाईमुळे जिल्ह्यात खळबळ उडाली आहे.
चोरी करणाऱ्या टोळीचा पर्दाफाश आणि जप्त मुद्देमाल
जालना जिल्ह्यात सोलर प्लांटवरील तांब्याचे केबल आणि कॉपर चोरी करणाऱ्या एका कुख्यात टोळीचा स्थानिक गुन्हे शाखेने पर्दाफाश केला आहे. या कारवाईत पोलिसांनी एका मुख्य आरोपीसह चोरीचे कॉपर विकत घेणाऱ्या ३ भंगार व्यावसायिकांना ताब्यात घेतले आहे.
पोलीस निरीक्षक पंकज जाधव आणि त्यांच्या पथकाने केलेल्या या कारवाईदरम्यान आरोपींकडून एकूण ७ लाख २९ हजार ४०० रुपयांचा मुद्देमाल जप्त करण्यात आला आहे. यामध्ये खालील गोष्टींचा समावेश आहे:
- ५३७ किलो तांब्याची केबल
- एक मोटारसायकल
- रोकड
७ गुन्हे उघडकीस
पोलिसांनी कसून चौकशी केली असता, पकडलेल्या आरोपींनी सोलर प्लांटवरील चोरीचे तब्बल ७ गुन्हे आणि रुई येथील १ घरफोडीचा गुन्हा केल्याची कबुली दिली आहे. याप्रकरणी स्थानिक गुन्हे शाखेचे पथक पुढील कायदेशीर तपास करत आहे.
