पारध बु. येथील शाळांसमोर स्पीड ब्रेकरचा अभाव; जिल्हाधिकाऱ्यांच्या ‘अल्टिमेटम’नंतर तरी सार्वजनिक बांधकाम विभाग जागे होणार का?
By तेजराव दांडगे
पारध बु. येथील शाळांसमोर स्पीड ब्रेकरचा अभाव; जिल्हाधिकाऱ्यांच्या ‘अल्टिमेटम’नंतर तरी सार्वजनिक बांधकाम विभाग जागे होणार का?
भोकरदन (जालना): जालना जिल्ह्यातील भोकरदन तालुक्यातील पारध बु. येथील गावहद्दीतील मुख्य रस्त्यावर गतिरोधक (स्पीड ब्रेकर) नसल्यामुळे नागरिक व शाळकरी विद्यार्थ्यांच्या सुरक्षेचा गंभीर प्रश्न निर्माण झाला आहे. या नवीन २०० मीटर रस्त्याचे बांधकाम पूर्ण होऊन येत्या नोव्हेंबर महिन्यात एक वर्ष पूर्ण होत आले आहे; मात्र, वर्षभरानंतरही संबंधित बांधकाम विभाग किंवा कंत्राटदाराकडून येथे सुरक्षेच्या कोणत्याही उपाययोजना करण्यात आलेल्या नाहीत.
शाळा, महाविद्यालये व बँकांमुळे सतत वर्दळ
या २०० मीटरच्या रस्त्यालगतच जिल्हा परिषद शाळा, माध्यमिक विद्यालय, इंग्लिश स्कूल, कनिष्ठ व वरिष्ठ महाविद्यालय तसेच विविध प्रमुख बँका आणि व्यावसायिक दुकाने आहेत. यामुळे या रस्त्यावरून दररोज शेकडो लहान-मोठे विद्यार्थी, महिला, नागरिक आणि ज्येष्ठ नागरिकांची मोठी वर्दळ असते. गतिरोधक नसल्याने या रस्त्यावरून लहान-मोठी वाहने अत्यंत वेगाने धावतात, ज्यामुळे मोठा अपघात होण्याची भीती सतत व्यक्त केली जात आहे.
वर्षभरात दोन अपघात; इशारा फलकही गायब
रस्ता तयार झाल्यापासून मागील काही महिन्यांत या ठिकाणी दोन ते तीन छोटे-मोठे अपघात झाले आहेत. तरीही सार्वजनिक बांधकाम विभाग अथवा संबंधित यंत्रणेला जाग आलेली नाही. रस्त्यावर वेगमर्यादेचे किंवा ‘पुढे शाळा आहे, वाहने हळू चालवा’ असे कोणतेही चेतावणी संकेत बोर्ड (Warning Boards) लावण्यात आलेले नाहीत.
जिल्हाधिकाऱ्यांचा १ ऑक्टोबरचा आदेश ठरतोय महत्त्वाचा
जालना जिल्हाधिकारी आशिमा मित्तल यांनी १ ऑक्टोबर रोजी घेतलेल्या जिल्हा रस्ते सुरक्षा समितीच्या बैठकीत जिल्ह्यातील सर्व प्रलंबित अपघातप्रवण ठिकाणांवर (ब्लॅक स्पॉट) व धोकादायक रस्त्यांवर तातडीने सुरक्षा उपाययोजना करण्याचे कडक निर्देश दिले आहेत. मागील बैठकीत सूचना देऊनही कामे अपूर्ण ठेवणाऱ्या राष्ट्रीय महामार्ग विभाग व सार्वजनिक बांधकाम विभागाला जिल्हाधिकाऱ्यांनी ७ दिवसांची अंतिम मुदत (अल्टिमेटम) दिली आहे.
ग्रामस्थांची मागणी: मोठा अपघात होण्याची वाट पाहणार का?
पारध बु. येथील नागरिक, पालक आणि शाळा प्रशासनाने प्रशासनाला सवाल केला आहे की, “एखादा मोठा आणि प्राणघातक अपघात घडल्यानंतरच प्रशासन जागे होणार का?”
जिल्हाधिकाऱ्यांच्या १ ऑक्टोबरच्या आदेशाची दखल घेऊन सार्वजनिक बांधकाम विभागाने पारध बु. येथील शाळा आणि बँकांसमोर तातडीने शास्त्रोक्त गतिरोधक (Speed Breakers) बसवावेत आणि सूचना फलक लावावेत, अशी रास्त व आग्रही मागणी पारध परिसरातील ग्रामस्थांकडून केली जात आहे.
