जालना धर्मांतर प्रकरण: मुख्य आरोपीतासह भाऊ जेरबंद; पोलीस अधीक्षक तेघबीर सिंह संधू यांची माहिती
By तेजराव दांडगे
जालना धर्मांतर प्रकरण: मुख्य आरोपीतासह भाऊ जेरबंद; पोलीस अधीक्षक तेघबीर सिंह संधू यांची माहिती
जालना (जिल्हा प्रतिनिधी): भोकरदन तालुक्यातील वालसावंगी येथील धर्मांतर आणि अत्याचार प्रकरणातील दोषींवर कठोर कारवाईची प्रक्रिया सुरू झाली आहे. जालना पोलीस अधीक्षक तेघबीर सिंह संधू यांनी या प्रकरणाबाबत अधिकृत माहिती देताना सांगितले की, पीडितेच्या तक्रारीनंतर पारध पोलिसांनी मुख्य आरोपीतासह त्याच्या भावाला अटक केली आहे.
नेमकी कारवाई काय?
अधीक्षक संधू यांनी सांगितले की, “आम्ही या प्रकरणात पोक्सो आणि बलात्काराच्या कलमान्वये गुन्हा नोंदवला आहे. मुख्य आरोपीत आणि त्याच्या भावाला अटक करण्यात आली असून, तक्रारीत नमूद असलेल्या धर्मांतराच्या मुद्द्यावर आमचे पथक सविस्तर तपास करत आहे.”
पार्श्वभूमी:
वालसावंगी येथील एका २५ वर्षीय तरुणीवर २०१६ पासून अत्याचार करून तिला धर्मांतरासाठी धमकावण्यात येत होते. पीडितेने हिंमत दाखवून पारध पोलीस ठाणे गाठल्यानंतर हे संपूर्ण प्रकरण उघडकीस आले.
पोलिसांनी दिलेल्या या तत्पर प्रतिसादामुळे नागरिकांमधून समाधान व्यक्त होत आहे. पुढील तपास पारध पोलीस करत असून, या प्रकरणात अजून काही धागेदोरे हाती लागण्याची शक्यता आहे.
