जालना: चंदनझिरा पोलिसांची मोठी कामगिरी; वादग्रस्त व्हिडिओ बनवून ब्लॅकमेल करणाऱ्या टोळीचा पर्दाफाश, मुख्य सूत्रधार महिलेसह ६ आरोपी अटकेत
By तेजराव दांडगे
जालना: चंदनझिरा पोलिसांची मोठी कामगिरी; वादग्रस्त व्हिडिओ बनवून ब्लॅकमेल करणाऱ्या टोळीचा पर्दाफाश, मुख्य सूत्रधार महिलेसह ६ आरोपी अटकेत
जालना (चंदनझिरा): वाहनात कोंबून अपहरण करणे, मारहाण करून जबरी चोरी करणे आणि लोकांचे वादग्रस्त व्हिडिओ बनवून त्यांना सोशल मीडियाच्या माध्यमातून ब्लॅकमेल करणाऱ्या एका मोठ्या आंतरजिल्हा टोळीचा चंदनझिरा पोलिसांनी पर्दाफाश केला आहे. या गुन्ह्याची मुख्य सूत्रधार असलेल्या एका सराईत महिलेसह एकूण ६ आरोपींना पोलिसांनी अवघ्या काही तासांत जेरबंद केले आहे. आरोपींकडून गुन्ह्यात वापरलेली वाहने, मोबाईल आणि लुटलेली रक्कम असा एकूण २ लाख ६१ हजार रुपयांचा (२,६१,०००/-) मुद्देमाल जप्त करण्यात आला आहे.
नेमकी काय आहे घटना?
मिळालेल्या माहितीनुसार, चंदनझिरा पोलीस ठाण्याच्या हद्दीतील नवीन मोंढा रोड परिसरात एका बोलेरो चालकाचे अचानक अपहरण करण्यात आले होते. आरोपींनी त्याला बळजबरीने वाहनात कोंबून ड्रायपोर्ट परिसरामध्ये नेले. तिथे त्याला बेदम मारहाण करून त्याच्याकडील रोख रक्कम आणि मोबाईल हिसकावून घेण्यात आला. एवढ्यावरच न थांबता, आरोपींनी तक्रारदाराचा एक क्षेपार्ह व्हिडिओ तयार केला आणि तो सोशल मीडियावर व्हायरल करण्याची धमकी दिली. या धमकीच्या बळावर तक्रारदाराच्या नातेवाईक व मित्रांकडून ‘फोनपे’ (PhonePe) द्वारे लाखो रुपयांची खंडणी आरोपींच्या खात्यावर वर्ग करण्यास भाग पाडले. या धक्कादायक प्रकारानंतर पीडिताने २३ जून २०२६ रोजी चंदनझिरा पोलीस ठाण्यात रीतसर तक्रार दाखल केली.
वरिष्ठ पोलीस अधिकाऱ्यांच्या मार्गदर्शनाखाली विशेष पथक
घटनेचे गांभीर्य ओळखून जालना जिल्ह्याचे पोलीस अधीक्षक तेगबीरसिंह संधु व अपर पोलीस अधीक्षक विक्रम साळी यांनी पोलीस निरीक्षक बाळासाहेब पवार यांना तातडीने गुन्ह्याचा छडा लावण्याचे आदेश दिले. त्यानुसार चंदनझिरा पोलिसांचे एक विशेष तपास पथक तात्काळ रवाना करण्यात आले.
बुलढाण्यात थरारक पाठलाग; मुख्य सूत्रधार महिला जाळ्यात
तपासादरम्यान पोलिसांना गुप्त माहिती मिळाली की, या संपूर्ण गुन्ह्याची मुख्य सूत्रधार असलेली २३ वर्षीय महिला बुलढाणा जिल्ह्यात लपून बसली आहे. पोलिसांनी तात्काळ बुलढाणा गाठून देऊळगाव राजा रोडवरील एका पेट्रोल पंपाजवळ पाठलाग करून मुख्य आरोपी सपना संतोष निकाळजे हिला ताब्यात घेतले. तिच्याकडे केलेल्या कसून चौकशीनंतर अवघ्या चार तासांत पोलिसांनी इतर ५ साथीदारांना वेगवेगळ्या ठिकाणांवरून अटक केली.
तांत्रिक तपासात असे समोर आले की, आरोपींनी तक्रारदाराच्या फोनपे खात्यातून ज्या यूपीआय आयडीवर (UPI ID) पैसे वर्ग केले होते, तो आयडी आरोपी सचिन कंठाळे याचा होता. त्यामुळे त्यालाही अटक करण्यात आली आहे. प्राथमिक तपासानुसार, मुख्य आरोपी सपना निकाळजे ही सराईत गुन्हेगार असून तिच्याविरुद्ध जालना आणि छत्रपती संभाजीनगर जिल्ह्यात अशा प्रकारे आर्थिक फसवणूक व ब्लॅकमेलिंगचे अनेक गुन्हे दाखल आहेत.
अटक करण्यात आलेले निष्पन्न आरोपी:
१) सपना संतोष निकाळजे (वय २३ वर्षे – मुख्य सूत्रधार)
२) अविनाश गणेश झोटे (वय २६ वर्षे)
३) अर्जुन चमन बहादूर राजपूत (वय ३४ वर्षे)
४) शंकर माणिक जाधव (वय २६ वर्षे)
+५) अतिष सतीश गायकवाड (वय १९ वर्षे)
६) सचिन लक्ष्मण कंठाळे (वय ३२ वर्षे)
या पोलीस पथकाने बजावली कामगिरी:
सदरची यशस्वी कामगिरी पोलीस अधीक्षक तेघबीर सिंह संधू, अपर पोलीस अधीक्षक विक्रम साळी, उपविभागीय पोलीस अधिकारी अनंत कुलकर्णी यांच्या मार्गदर्शनाखाली पोलीस निरीक्षक बाळासाहेब पवार, पोलीस हेकॉ कृष्णा तंगे, राजेंद्र पवार, अशोक जाधव, अभिजीत वायकोस, सागर खैरे, महिला पोलीस सखु शिंदे आणि अनुराधा बांडे यांच्या पथकाने पार पाडली. पोलिसांच्या या कामगिरीचे जालना जिल्ह्यात कौतुक होत आहे.
