भोकरदन: मोहळाई शिवारात प्लॉटच्या वादातून हाणामारी; वृद्ध शेतकऱ्यावर कुऱ्हाडीने हल्ला, पारध पोलिसांत गुन्हा दाखल

​पारध (प्रतिनिधी): भोकरदन तालुक्यातील मोहळाई शिवारात प्लॉटिंगच्या जमिनीच्या जुन्या वादावरून एका ५५ वर्षीय वृद्ध शेतकऱ्याला आणि साक्षीदाराला लाथाबुक्क्यांनी मारहाण करत कुऱ्हाडीने वार करून जखमी केल्याची धक्कादायक घटना समोर आली आहे. या प्रकरणी पारध पोलीस ठाण्यात एका संशयित इसमाविरुद्ध भारतीय न्याय संहितेच्या (BNS) विविध कलमांन्वये गुन्हा दाखल करण्यात आला आहे.

​प्लॉटच्या कारणावरून वाद विकोपाला:

​फिर्यादी राजू दौलत वाघ (वय ५५ वर्षे, रा. कोसगाव, ता. भोकरदन, जि. जालना) आणि आरोपीत हे आपसात नातेवाईक आहेत. त्यांच्यामध्ये प्लॉटिंगच्या जमिनीवरून जुना वाद सुरू आहे. २१ मे २०२६ रोजी दुपारी ४:३० वाजेच्या सुमारास मौजे मोहळाई शिवारामध्ये याच कारणावरून पुन्हा वाद झाला.

​हा वाद अचानक विकोपाला गेला आणि संशयित आरोपीत ज्ञानेश्वर आनंदा वाघ (रा. मोहळाई, ता. भोकरदन) याने फिर्यादी राजू वाघ व तिथे उपस्थित साक्षीदाराला बेदम मारहाण करण्यास सुरुवात केली.

​कुऱ्हाडीने डोक्यात वार:

​मारहाण करत असतानाच संशयित आरोपीता ने फिर्यादी राजू वाघ यांच्या डोक्यात कुऱ्हाडीने मारून गंभीर दुखापत केली. तसेच परिसरात गोंधळ घालत शिवीगाळ करून जिवे मारण्याची धमकी दिली. या घटनेनंतर परिसरात एकच खळबळ उडाली असून जखमींवर उपचार सुरू आहेत.

​पारध पोलीस ठाण्यात गुन्हा दाखल:

​घटनेनंतर पीडित शेतकऱ्याने दिलेल्या तक्रारीवरून पारध पोलिसांनी संशयित आरोपीत ज्ञानेश्वर आनंदा वाघ याच्याविरुद्ध गुन्हा रजि. नं. १४४/२०२६, कलम ११८(१), ११५(२), ३५१(२), ३५२, BNS (भारतीय न्याय संहिता) अन्वये गुन्हा नोंदवला आहे.

​हा गुन्हा रात्री ९:१९ वाजेच्या सुमारास पोहेकॉ/१४०६ जी. डी. भुतेकर यांनी दाखल केला असून, सहाय्यक पोलीस निरीक्षकांच्या मार्गदर्शनाखाली पोहेकॉ/४९८ पी. एन. सिनकर या प्रकरणाचा पुढील कायदेशीर तपास करत आहेत.