जालना: समर्थनगर घरफोडी प्रकरणातील सराईत गुन्हेगार जेरबंद; चार गुन्हे उघडकीस आणत २ लाख २७ हजारांचा मुद्देमाल जप्त
By तेजराव दांडगे
जालना: समर्थनगर घरफोडी प्रकरणातील सराईत गुन्हेगार जेरबंद; चार गुन्हे उघडकीस आणत २ लाख २७ हजारांचा मुद्देमाल जप्त
विशेष प्रतिनिधी | डिजिटल वृत्तसेवा
जालना: शहरातील समर्थनगर भागात झालेल्या घरफोडी प्रकरणातील सराईत आरोपीताला स्थानिक गुन्हे शाखेच्या पथकाने जेरबंद केले आहे. या कारवाईदरम्यान पोलिसांनी जालन्यातील चार घरफोडीचे गुन्हे उघडकीस आणले असून, आरोपीकडून एकूण २ लाख २७ हजार रुपये किमतीचा मुद्देमाल जप्त करण्यात आला आहे.
कारवाईची पार्श्वभूमी
जालना जिल्ह्यात घरफोडी करणाऱ्या आरोपीतांचा शोध घेऊन गुन्हे उघडकीस आणण्याबाबत पोलीस अधीक्षक तेघबीर सिंह संधू यांनी स्थानिक गुन्हे शाखेचे पोलीस निरीक्षक पंकज जाधव यांना विशेष सूचना दिल्या होत्या. त्यानुसार स्थानिक गुन्हे शाखेच्या पथकाने चक्र हालवत तपास सुरू केला होता.
अशी झाली कारवाई
दिनांक ९ ऑक्टोबर २०२६ रोजी स्थानिक गुन्हे शाखेच्या पथकाला गोपनीय बातमी मिळाली की, समर्थनगर (जुना जालना) येथे ३० सप्टेंबर २०२६ रोजी झालेली घरफोडी किशोरसिंग उर्फ टकल्या रामसिंग टाक (रा. द्वारकानगर, जालना) व त्याच्या साथीदारांनी केली आहे. या खात्रीलायक माहितीच्या आधारे पोलिसांनी द्वारकानगर परिसरात सापळा रचून आरोपीला ताब्यात घेतले.
पोलिसांनी कसून चौकशी केली असता त्याने गुन्हा केल्याची कबुली दिली. तसेच जुना जालना, कसब्या, जयशंकर नगर आणि गोपीकिशननगर परिसरातील घरफोडीच्या आणखी तीन गुन्ह्यांचीही त्याने कबुली दिली आहे. १५ दिवसांपूर्वी गुंडेवाडी परिसरातून होंडा लिओ कंपनीची मोटारसायकल (रजि.क्र. MH21CJ3602) चोरी करून त्याच वाहनाचा वापर करून साथीदारांच्या मदतीने हे गुन्हे केल्याचे त्याने सांगितले. चोरी केलेले दागिने एका सोनाराला विकल्याचे समोर आले असून, त्याचे दोन साथीदार व संबंधित सोनाराचा शोध सुरू आहे.
जप्त करण्यात आलेला मुद्देमाल
- आरोपीत: किशोरसिंग उर्फ टकल्या रामसिंग टाक (वय ३० वर्षे, रा. द्वारकानगर, जालना)
- मुद्देमाल: चोरीची मोटारसायकल, आयफोन १७ प्रो मॅक्स आणि २७ हजार रुपये रोख रक्कम (एकूण किंमत २,२७,००० रुपये)
उघडकीस आलेले गुन्हे
१. कदीम पोलीस ठाणे, जालना (गु.र.नं. ५५६/२०२६)
२. कदीम पोलीस ठाणे, जालना (गु.र.क्र. ५४३/२०२६)
३. सदर बाजार पोलीस ठाणे, जालना (गु.र.क्र. २९१/२०२६)
४. सदर बाजार पोलीस ठाणे, जालना (गु.र.क्र. ५००/२०२६)
पोलीस पथकाची कामगिरी
सदरची यशस्वी कारवाई पोलीस अधीक्षक तेघबीर सिंह संधू, अपर पोलीस अधीक्षक डॉ. विक्रम साळी, उपविभागीय पोलीस अधिकारी अनंत कुलकर्णी यांच्या मार्गदर्शनाखाली स्थानिक गुन्हे शाखेचे पोलीस निरीक्षक पंकज जाधव, पोलीस उपनिरीक्षक राजेंद्र वाघ आणि स्थानिक गुन्हे शाखेच्या अंमलदारांच्या पथकाने पार पाडली आहे.
