जालना: एका वर्षात पैसे तिप्पट करण्याचे आमिष दाखवून १.३२ कोटींची फसवणूक; आर्थिक गुन्हे शाखेकडून दोघांना अटक, ५ दिवसांची पोलीस कस्टडी

जालना: एका वर्षात पैसे तिप्पट करण्याचे आमिष दाखवून १.३२ कोटींची फसवणूक; आर्थिक गुन्हे शाखेकडून दोघांना अटक, ५ दिवसांची पोलीस कस्टडी

​जालना (D9 न्यूज डिजिटल डेस्क): एफएमसीजी (FMCG) कंपनीत गुंतवणूक केल्यास एका वर्षात पैसे तिप्पट करून देण्याचे प्रलोभन दाखवून ५० हून अधिक गुंतवणूकदारांची तब्बल १ कोटी ३२ लाख ५ हजार रुपयांची फसवणूक केल्याचा प्रकार उघडकीस आला आहे. या प्रकरणी कदिम जालना पोलीस ठाण्यात गुन्हा दाखल झाल्यानंतर, कारवाई करत आर्थिक गुन्हे शाखेने (EOW) दोन आरोपींना अटक केली आहे. न्यायालयाने दोन्ही आरोपीतांना ५ दिवसांची पोलीस कोठडी सुनावली आहे.

​काय आहे प्रकरण?

पोलीस प्रसिद्धीपत्रकानुसार, जालना शहरातील शेरसवार नगर येथील तक्रारदार शिक्षक मोहम्मद फेरोज अब्दुल सत्तार यांच्यासह त्यांचे भाऊ आणि इतर जवळच्या ५० गुंतवणूकदारांना एफएमसीजी कंपनीत गुंतवणुकीवर एका वर्षात तीनपट परतावा देण्याचे आमिष दाखवण्यात आले होते. मात्र, रक्कम गुंतवल्यानंतर परतावा न मिळता फसवणूक झाल्याचे निदर्शनास आल्यावर ३ ऑक्टोबर २०२६ रोजी कदिम जालना पोलीस ठाण्यात भारतीय न्याय संहिता (BNS) आणि ‘एमपीआयडी’ (MPID) कायद्यान्वये गुन्हा दाखल करण्यात आला.

​दोन आरोपीतांना जुना जालन्यातून अटक

पोलीस अधीक्षक तेगबीरसिंह संधू यांच्या आदेशानुसार या प्रकरणाचा तपास आर्थिक गुन्हे शाखेकडे सोपवण्यात आला आहे. फरार आरोपीतांचा शोध घेत असताना मिळालेल्या माहितीच्या आधारे आर्थिक गुन्हे शाखेच्या पथकाने ७ ऑक्टोबर रोजी रात्री जुना जालन्यातील इतवार गल्ली परिसरातून वसिम अहेमद अब्दुल गफार (वय ३७) आणि मोहम्मद युनुस अहेमद मोहम्मद सलीम (वय ३४) या दोन आरोपीतांना ताब्यात घेऊन अटक केली.

​५ दिवसांची पोलीस कोठडी मंजूर

अटक करण्यात आलेल्या दोन्ही आरोपीतांना ८ ऑक्टोबर रोजी जालना येथील विशेष ‘एमपीआयडी’ न्यायालयात हजर करण्यात आले. तपासासाठी न्यायालयाकडून आरोपींना ५ दिवसांची पोलीस कस्टडी रिमांड (PCR) मंजूर करण्यात आली आहे. या गुन्ह्यातील मुख्य सूत्रधार अद्याप फरार असून त्याचा शोध घेण्यासाठी पोलिसांची दोन पथके रवाना झाली आहेत.

​तक्रार नोंदवण्याचे पोलिसांचे आवाहन

या योजनेत पैसे तिप्पट करण्याचे आमिष दाखवण्यात आल्यामुळे बाधित गुंतवणूकदारांची संख्या वाढण्याची शक्यता पोलिसांनी वर्तवली आहे. ज्या नागरिकांनी किंवा गुंतवणूकदारांनी अशा प्रकारच्या आमिषाला बळी पडून या कंपनीत पैसे गुंतवले असतील, त्यांनी तात्काळ आर्थिक गुन्हे शाखा, जालना येथे संपर्क साधून आपली तक्रार नोंदवावी, असे आवाहन पोलीस प्रशासनाकडून करण्यात आले आहे.