जालन्यातील निसर्गोपचार तज्ज्ञ डॉ. दिलीप काटोले यांचा राज्यस्तरीय सेमिनारमध्ये विशेष सन्मान
By गौतम वाघ
जालन्यातील निसर्गोपचार तज्ज्ञ डॉ. दिलीप काटोले यांचा राज्यस्तरीय सेमिनारमध्ये विशेष सन्मान
छत्रपती संभाजीनगर: जालना येथील प्रसिद्ध निसर्गोपचार तज्ज्ञ डॉ. दिलीप काटोले यांचा ‘राज्यस्तरीय निसर्गोपचार सेमिनार २०२६’ मध्ये विशेष सन्मान करण्यात आला. महाराष्ट्राचे माजी इतर मागास बहुजन कल्याण मंत्री तथा दिव्यांग कल्याण मंत्री अतुल सावे यांच्या हस्ते डॉ. काटोले यांना प्रमाणपत्र आणि सन्मानचिन्ह प्रदान करून गौरविण्यात आले.
हा राज्यस्तरीय सेमिनार MNO निसर्गोपचार आणि योग फाउंडेशन (रजि.) संचलित महाराष्ट्र निसर्गोपचार ऑर्गनायझेशन, महाराष्ट्र राज्य यांच्या वतीने छत्रपती संभाजीनगर येथे आयोजित करण्यात आला होता. या कार्यक्रमास विविध भागांतून विद्यार्थी, निसर्गोपचार तज्ज्ञ, योग तज्ज्ञ, प्राध्यापक, संशोधक आणि वैद्यकीय क्षेत्रातील मान्यवर मोठ्या संख्येने उपस्थित होते.
या सेमिनारमध्ये निसर्गोपचार क्षेत्रातील आधुनिक संशोधन, वैज्ञानिक दृष्टिकोन, व्यावहारिक उपचारपद्धती आणि भविष्यातील संधींवर विविध तज्ज्ञांनी सखोल मार्गदर्शन केले. या उपक्रमामुळे निसर्गोपचार व योग क्षेत्रातील ज्ञानाची देवाणघेवाण होण्यासोबतच या क्षेत्रात कार्यरत असणाऱ्या तज्ज्ञांना मोठे प्रोत्साहन मिळाले आहे.
डॉ. दिलीप काटोले यांनी निसर्गोपचार क्षेत्रात केलेल्या उल्लेखनीय कार्याची दखल घेत हा सन्मान करण्यात आला असून, हा गौरव त्यांच्या पुढील कार्यासाठी प्रेरणादायी ठरणार असल्याचे व्यक्त केले जात आहे.
