भोकरदन: म्हाडा कॉलनी परिसरात पोलिसांची मोठी कारवाई; अनैतिक व्यवसाय चालवणाऱ्या पती-पत्नीसह ३ जणांवर गुन्हा दाखल
By तेजराव दांडगे
भोकरदन: म्हाडा कॉलनी परिसरात पोलिसांची मोठी कारवाई; अनैतिक व्यवसाय चालवणाऱ्या पती-पत्नीसह ३ जणांवर गुन्हा दाखल
भोकरदन (विशेष प्रतिनिधी): भोकरदन शहरातील म्हाडा कॉलनी परिसरामध्ये बेकायदेशीररित्या अनैतिक मानवी व्यापार आणि वेश्याव्यवसाय चालवणाऱ्या एका जोडप्यावर भोकरदन पोलिसांनी धडक छापा टाकून कारवाई केली आहे. या कारवाईत पोलिसांनी पीडित महिलेची सुटका केली असून, घटनास्थळावरून ३५,६८० रुपयांची रोख रक्कम जप्त केली आहे. या प्रकरणी अनैतिक व्यवसाय चालवणाऱ्या पती-पत्नीसह संबंधित खोली मालकाविरुद्ध गुन्हा दाखल करण्यात आला आहे.
गुप्त माहितीच्या आधारे पोलिसांचा छापा:
२३ मे २०२६ रोजी दुपारी १२:०० वाजेच्या सुमारास भोकरदन पोलीस ठाण्याचे प्रभारी अधिकारी तथा पोलीस निरीक्षक किरण बिडवे यांना म्हाडा कॉलनी येथील गजानन मंदिराजवळ असलेल्या एका टीनपत्र्याच्या शेडमध्ये बेकायदेशीर अनैतिक व्यवसाय सुरू असल्याची खात्रीलायक गुप्त माहिती मिळाली होती.
या माहितीच्या आधारे जालना जिल्हा पोलीस अधीक्षक यांच्या मार्गदर्शनाखाली पोलीस पथकाने दुपारी २:४५ वाजेच्या सुमारास सदर ठिकाणी छापा टाकला. या छाप्यात संशयित आरोपी गणपत रामधीन सेठी (वय ५४ वर्ष) आणि गीतांजली गणपत सेठी (वय ५१ वर्ष, दोन्ही रा. राजूर, ता. भोकरदन, जि. जालना) हे स्वतःच्या आर्थिक फायद्यासाठी बाहेरच्या जिल्ह्यातील महिलांना बोलावून त्यांच्याकडून हा बेकायदेशीर व्यवसाय करून घेत असल्याचे निष्पन्न झाले.
३ जणांवर गुन्हा दाखल; संशयितांवर पूर्वीही गुन्हे:
पोलिसांनी या कारवाई दरम्यान एका पीडित महिलेची सुटका केली असून ३५,६८० रुपयांची रोख रक्कम जप्त केली आहे. या प्रकरणी अनैतिक व्यवसाय चालवणारे पती-पत्नी तसेच ती जागा भाड्याने देणारा खोली मालक ज्ञानेश्वर विनायक वाघ (रा. भोकरदन) अशा तीन जणांविरुद्ध कलम ३, ४, ५ अनैतिक व्यापार प्रतिबंध अधिनियम १९५६ (PITA Act) प्रमाणे भोकरदन पोलीस ठाण्यात गुन्हा नोंदवण्यात आला आहे. विशेष म्हणजे, संशयित पती-पत्नीवर यापूर्वीही हसनाबाद पोलीस ठाण्यात अशाच प्रकारचा गुन्हा दाखल असल्याची माहिती पोलिसांनी दिली आहे.
कारवाई करणारे पोलीस पथक:
सदर यशस्वी कामगिरी जालना पोलीस अधीक्षक तेघबीर सिंह संधु, अपर पोलीस अधीक्षक विक्रम साळी, उपविभागीय पोलीस अधिकारी डॉ. नितीन कटेकर यांच्या मार्गदर्शनाखाली पोलीस निरीक्षक किरण बिडवे, पोलीस उपनिरीक्षक पवन राजपूत, चालक ग्रेड पोउपनि चव्हाण, प्रशांत उबाळे, शिवाजी जाधव, किशोर मोरे, संदीप भुतेकर, महिला पोलीस अंमलदार सीमा देठे आणि जयश्री कुहीरे यांनी केली आहे. या गुन्ह्याचा पुढील तपास पोलीस उपनिरीक्षक भाऊसाहेब सहाने आणि इंदल बमनावत करत आहेत.
