सुनिल थोरात (हवेली)
पुणे हवेली : अंमली पदार्थाची तस्करी करणाऱ्या एका तस्कराला पुणे सोलापूर रोड, कदमवकवस्ती ग्रामपंचायत हद्दीतील कवडीपाट टोल नाक्याजवळ शुक्रवारी (दि. १३) सकाळी साडेसहा वाजण्याच्या सुमारास अटक करण्यात आली आहे.
३ लाख १३ हजार ८४० रुपये किंमतीचा १४ किलो १८२ ग्रॅम गांजा हस्तगत करण्यात आला आहे.
लोणी काळभोर पोलीस व पुणे शहर गुन्हे शाखेच्या अंमली पदार्थ विरोधी पथक क्रमांक १ च्या पोलिसांनी एकत्रित केली.
साहिल विनायक जगताप (वय-28, रा. हनुमान नगर, साईबाबा मंदिरा जवळ, केळेवाडी, कोथरुड पुणे) असे अटक करण्यात आलेल्या इसमाचे नाव असून त्याला ताब्यात घेण्यात आले आहे.
पोलिसांना मिळालेल्या माहितीनुसार, अंमली पदार्थ विरोधी पथक-1 व लोणी काळभोर पोलीस हे लोणी काळभोर पोलीस ठाण्याच्या हद्दीत गस्त घालत असताना, पोलिसांना लोणी टोलनाका जवळ, रेड्डी हॉटेल शेजारी गांजाची तस्करी होणार अशी माहिती खबऱ्यामार्फत मिळाली असता पोलिसांनी त्या ठिकाणी सापळा रचून आरोपी साहिल जगताप याला मोठ्या शिताफीने पकडले. त्याची अंगझडती घेतली असता, त्याच्या बॅगमध्ये ३ लाख १३ हजार ८४० रुपये किंमतीचा सुमारे १४ किलो १८२ ग्रॅम गांजा आढळून आला.
पोलिसांनी याप्रकरणी साहिल जगताप याला तात्काळ अटक केली असून त्याच्यावर लोणी काळभोर पोलीस ठाण्यात अंमली पदार्थ आणि सायकोट्रॉपिक पदार्थ कायदा कलम 8 (क), 20 (ब) (ii) (ब) प्रमाणे गुन्हा दाखल करण्यात आला.
ही कारवाई पुणे शहर अपर पोलीस आयुक्त (गुन्हे) शैलेश बलकवडे, पोलीस उप आयुक्त (गुन्हे) निखील पिंगळे, सहाय्यक पोलीस आयुक्त (गुन्हे १) गणेश इंगळे यांच्या मार्गदर्शनाखाली अंमली पदार्थ विरोधी पथक क्र. १ चे पोलीस निरीक्षक उल्हास कदम लोणी काळभोर पोलीस ठाण्याचे सहाय्यक पोलीस निरीक्षक शशिकांत खोसे, पोलीस अंमलदार मारुती पारधी, प्रविण उत्तेकर, विनायक साळवे, दत्ताराम जाधव, दयानंद तेलंगे, सुजित वाडेकर, योगेश मोहिते, बालाजी बांगर, ईश्वर भगत यांच्या पथकाने यशस्वी पणे पार पाडली.
