जालन्यात पोलिसांची मोठी कारवाई; जुना जालना भागातून २० गोवंशीय जनावरांची सुटका, दोघांवर गुन्हा दाखल
By तेजराव दांडगे
जालन्यात पोलिसांची मोठी कारवाई; जुना जालना भागातून २० गोवंशीय जनावरांची सुटका, दोघांवर गुन्हा दाखल
जालना: आगामी सणांच्या पार्श्वभूमीवर बेकायदेशीर कृत्य आणि जनावरांच्या अवैध वाहतूक व साठवणुकीविरुद्ध जालना पोलिसांनी मोठी कारवाई केली आहे. जुना जालना भागातील मोरंडी मोहल्ला येथे विनापरवाना व निर्दयतेने डांबून ठेवण्यात आलेल्या २० गोवंशीय जनावरांची कदीम जालना पोलिसांनी यशस्वी सुटका केली आहे. या कारवाईत पोलिसांनी सुमारे पावणेसात लाख रुपयांचा मुद्देमाल जप्त केला असून दोन संशयित आरोपींविरुद्ध गुन्हा दाखल केला आहे.
मिळालेल्या माहितीनुसार, दिनांक २६ मे २०२६ रोजी रात्री ११:०० वाजताच्या सुमारास कदीम जालना पोलिसांना एक खात्रीशीर माहिती मिळाली होती. मोरंडी मोहल्ला येथील एका आवारात मोठ्या प्रमाणावर जनावरे अत्यंत दाटीवाटीने आणि निर्दयतेने डांबून ठेवण्यात आली आहेत. या माहितीच्या आधारे पोलीस निरीक्षक जनार्धन शेवाळे यांच्या नेतृत्वाखालील पथकाने मध्यरात्री ०१:३० वाजताच्या सुमारास दोन पंचांसह संबंधित ठिकाणी अचानक छापा टाकला.
पावणेसात लाखांचा मुद्देमाल जप्त
पोलिसांनी टाकलेल्या या छाप्यात त्या ठिकाणी ७ गोऱ्हे आणि १३ बैल अशी एकूण २० गोवंशीय जनावरे आढळून आली. ही सर्व जनावरे अत्यंत वाईट परिस्थितीत कोंडून ठेवण्यात आली होती. पोलिसांनी तात्काळ या सर्व जनावरांची सुटका केली. जप्त करण्यात आलेल्या जनावरांची अंदाजे किंमत खालीलप्रमाणे आहे:
७ गोऱ्हे: अंदाजे किंमत १,७५,००० रुपये (प्रत्येकी २५,००० रुपये)
१३ बैल: अंदाजे किंमत ५,२०,००० रुपये (प्रत्येकी ४०,००० रुपये)
एकूण जप्त मुद्देमाल: ६,९५,००० रुपये
दोघांवर गुन्हा दाखल
या प्रकरणी कदीम जालना पोलीस ठाण्यात गु.र.नं. २७८/२०२६ अन्वये प्राण्यांचे संरक्षण अधिनियम आणि प्राण्यांना क्रूरतेने वागवण्यास प्रतिबंध करणाऱ्या विविध कलमांखाली गुन्हा नोंदवण्यात आला आहे. या कारवाईत पोलिसांनी खालील संशयित आरोपीतांची नावे निष्पन्न केली आहेत:
१) शेख जुबेर शेख फिरोज (रा. मोरंडी मोहल्ला, जुना जालना)
२) ग्यासोद्दीन कमरुद्दीन कुरेशी (रा. मोरंडी मोहल्ला, जुना जालना)
या पोलीस पथकाने केली कारवाई
सदर धडक कारवाई जालना जिल्ह्याचे पोलीस अधीक्षक तेघबीर सिंह संधू, अप्पर पोलीस अधीक्षक विक्रम साळी आणि उपविभागीय पोलीस अधिकारी अनंत कुलकर्णी यांच्या मार्गदर्शनाखाली करण्यात आली.
या मोहिमेत कदीम जालना पोलीस ठाण्याचे पोलीस निरीक्षक जे. बी. शेवाळे, जिल्हा नियंत्रण कक्षाचे सपोनि अविनाश गडाख, सपोनि अमित मस्के, सफौ बरडे, सफौ खरात, पोहेकॉ कोकणे, पोहेकॉ सदा राठोड, पोहेकॉ उरफाटे, पोना बाबा गायकवाड, पोना ताहेर शेख आणि पोकॉ सदाशीव मुटकुळे यांनी महत्त्वाची भूमिका बजावली. या गुन्ह्याचा पुढील तपास महिला पोलीस अंमलदार (मपोहेकॉ) प्रतिभा पंडुरे या करत आहेत.
