भोकरदन न्यायालयात गैरहजर राहणाऱ्या दोन आरोपीतांवर नवीन भारतीय न्याय संहितेनुसार गुन्हा दाखल; पोलिसांनी केली अटक
By तेजराव दांडगे
भोकरदन न्यायालयात गैरहजर राहणाऱ्या दोन आरोपीतांवर नवीन भारतीय न्याय संहितेनुसार गुन्हा दाखल; पोलिसांनी केली अटक
पारध (विशेष वृत्त): भोकरदन न्यायालयाच्या आदेशाचे उल्लंघन करून वारंवार गैरहजर राहणाऱ्या दोन आरोपीतांवर पारध पोलीस ठाण्यात नवीन भारतीय न्याय संहितेनुसार (BNS) गुन्हा दाखल करण्यात आला आहे. गैरजमीनपात्र वॉरंट (NBW) बजावून दोन्ही आरोपीतांना पारध पोलिसांनी अटक केली आहे.
नेमके प्रकरण काय?
पोलीस सूत्रांकडून मिळालेल्या माहितीनुसार, अटकेत असलेल्या आरोपीतांची नावे खालीलप्रमाणे आहेत:
- शोएब उर्फ लोहिया शरीफ तडवी (वय २४ वर्षे, रा. धावडा, ता. भोकरदन)
- नासिर शहा शब्बीर शहा (वय ३४ वर्षे, रा. पिंपळगाव रेणुकाई, ता. भोकरदन, जि. जालना)
सदर आरोपीतांविरुद्ध माननीय प्रथम वर्ग न्यायदंडाधिकारी, भोकरदन न्यायालयाने यापूर्वी वारंवार गैरजमीनपात्र वॉरंट (NBW) जारी केले होते. तरीदेखील आरोपीत न्यायालयात हजर राहत नव्हते.
जामीन अटींचे उल्लंघन आणि नवीन गुन्हा
जामीन मंजूर झाल्यानंतर न्यायालयाच्या अटी व शर्तींचे पालन करणे बंधनकारक असते. मात्र, दोन्ही आरोपीतांनी कोणत्याही ठोस आणि पुरेशा कारणाशिवाय न्यायालयात उपस्थित राहण्यास टाळाटाळ केली.
न्यायालयाच्या अटींचा भंग करून गैरहजर राहिल्याप्रकरणी आरोपीतांवर भारतीय न्याय संहिता (BNS) कलम २६९ अन्वये पारध पोलीस ठाण्यात गुन्हा दाखल करण्यात आला आहे. त्यानंतर पोलिसांनी तात्काळ कारवाई करत दोन्ही आरोपींना NBW वॉरंटअंतर्गत अटक केली आहे.
न्यायालयीन प्रक्रियेचे उल्लंघन करणाऱ्यांवर पोलीस प्रशासनाकडून अशीच कडक कायदेशीर कारवाई केली जाईल, असा इशारा पोलिसांनी दिला आहे.
