यलो अलर्ट जारी: जालना जिल्ह्यात सोसाट्याचा वारा, पावसाची शक्यता; प्रशासनाकडून दक्षता घेण्याचे आवाहन

यलो अलर्ट जारी: जालना जिल्ह्यात सोसाट्याचा वारा, पावसाची शक्यता; प्रशासनाकडून दक्षता घेण्याचे आवाहन

जालना दि. 24 : प्रादेशिक हवामानशास्त्र केंद्र, कुलाबा, मुंबई यांनी दिलेल्या माहितीनुसार जालना जिल्ह्यासाठी महत्त्वाच्या हवामान अंदाजाची सूचना जारी झाली आहे. दिनांक 24 ऑक्टोबर व 25 ऑक्टोबर 2025 रोजी जिल्ह्यासाठी यलो (Yellow) अलर्ट जाहीर करण्यात आला असून, या काळात तुरळक ठिकाणी विजेच्या कडकडाटासह वादळी वारे, हलका ते मध्यम पाऊस आणि सोसाट्याचा वारा (ताशी 30-40 कि.मी. वेगाने) येण्याची शक्यता वर्तवण्यात आली आहे.

तसेच, दिनांक 26 ते 28 ऑक्टोबर 2025 या कालावधीतही जिल्ह्यात हलक्या ते मध्यम स्वरूपाचा पाऊस पडण्याची शक्यता आहे.

या पार्श्वभूमीवर जिल्हा प्रशासनाने जिल्ह्यातील नागरिकांना आणि शेतकऱ्यांना संभाव्य नुकसान टाळण्यासाठी योग्य ती दक्षता घेण्याचे आवाहन केले आहे.

नागरिकांसाठी महत्त्वाच्या सूचना:

 १) मेघगर्जनेच्या वेळी, वीजा चमकत असताना किंवा वादळी वारे वाहत असतांना झाडांखाली किंवा झाडांजवळ उभे राहू नये.

 २) वीजेपासून बचावासाठी सुरक्षित ठिकाणी आश्रय घ्यावा आणि धोकादायक ठिकाणी सेल्फी काढू नये.

 ३) गडगडाटीच्या वादळादरम्यान व वीजा चमकत असताना कोणत्याही विद्युत उपकरणांचा वापर करू नये.

 ४) ट्रॅक्टर्स, शेतीची अवजारे, मोटारसायकल/सायकल यांचेपासून दूर रहावे.

 ५) मोकळे मैदान, झाडांखाली, टॉवर्स, ध्वजांचे खांब, विद्युत/दिव्यांचे खांब, धातूचे कुंपण, विद्युतवाहिनी अथवा ट्रान्सफॉर्मरजवळ थांबू नये.

 ६) सर्व प्रकारच्या अर्थातरी लटकणाऱ्या / लोंबणाऱ्या तारांपासून दूर रहावे.

 ७) वीजा चमकत असताना मोकळ्या जागेवर असल्यास सुरक्षेसाठी गुडघ्यावर बसून हाताने कान झाकावे आणि डोके गुडघ्यांमध्ये झाकावे; जमिनीशी कमीतकमी संपर्क ठेवावा.

शेतकऱ्यांसाठी विशेष आवाहन:

 १) अवकाळी पाऊस व गारपिटीमुळे शेतीमालाचे नुकसान टाळण्यासाठी शेतकरी बांधवांनी वेळीच नियोजन करावे.

 २) शेतकऱ्यांनी शेतमाल सुरक्षित ठिकाणी साठवून ठेवावा.

 ३) बाजार समितीमध्ये विक्रीसाठी आणलेला किंवा नियोजित केलेला शेतमाल सुरक्षित राहील याची काळजी घ्यावी.

 ४) जनावरांचे सुरक्षित ठिकाणी स्थलांतर करावे.

सर्व नागरिकांनी वादळी वारे आणि वीज यांपासून स्वतःसह जनावरांचे संरक्षण होईल याबाबत योग्य ती दक्षता घ्यावी.

आपत्कालीन परिस्थितीत संपर्क:

आपत्कालीन परिस्थितीत नागरिकांनी जिल्हा नियंत्रण कक्ष, जिल्हाधिकारी कार्यालय, जालना – 02482-223132 या क्रमांकावर तसेच नजीकचे तहसील कार्यालय किंवा पोलीस स्टेशन येथे संपर्क साधावा, असे आवाहन निवासी उपजिल्हाधिकारी तथा मुख्य कार्यकारी अधिकारी, जिल्हा आपत्ती व्यवस्थापन प्राधिकरण, शशीकांत हदगल यांनी प्रसिध्दीपत्रकाद्वारे केले आहे.