ग्रामीण आरोग्याचा कणा मोडकळीस: आठ महिन्यांपासून मानधनाविना ‘आशा’ सेविकांचा संघर्ष, आता संपाचा एल्गार!

ग्रामीण आरोग्याचा कणा मोडकळीस: आठ महिन्यांपासून मानधनाविना ‘आशा’ सेविकांचा संघर्ष, आता संपाचा एल्गार!

पारध, दि. 05: ग्रामीण महाराष्ट्राच्या आरोग्य व्यवस्थेचा आधारस्तंभ असलेल्या आशा सेविका गेल्या आठ महिन्यांपासून आपल्या मासिक मानधनापासून वंचित आहेत, तर त्यांचे वाढीव मानधनही अनेक महिन्यांपासून रखडले आहे. “काम चालू, मानधन बंद” अशा विचित्र परिस्थितीतून जात असलेल्या या आरोग्य दूतांनी आता थेट काम बंद आंदोलनाचा इशारा दिला आहे. पेरणीच्या तोंडावर आणि मुलांच्या शाळा सुरू होण्याच्या पार्श्वभूमीवर, घरात आर्थिक चणचण असल्याने त्यांच्यासमोरील अडचणींचा डोंगर वाढला आहे.

कोरोना काळातील योगदान विस्मृतीत?
कोरोना महामारीच्या काळात, आरोग्य विभागातील अनेक पदे रिक्त असतानाही, आशा सेविकांनी डॉक्टर्स आणि पोलिसांच्या खांद्याला खांदा लावून मोठे योगदान दिले. आवश्यक साधने आणि प्रशिक्षणाचा अभाव असतानाही, त्यांनी आपल्या जीवाची पर्वा न करता कोरोना नियंत्रणात मोलाची भूमिका बजावली. मात्र, त्यांच्या या निःस्वार्थ सेवेचा प्रशासनाला विसर पडल्याचे चित्र आहे.

पारध येथील आशा सेविकांची व्यथा:
भोकरदन तालुक्यातील पारध येथील आशा सेविकांनी आपली कैफियत मांडताना सांगितले की, “आठ महिन्यांपासून मानधन मिळालेले नाही, त्यामुळे मुलांची शाळेची फी भरणेही कठीण झाले आहे. घरात पैशांची टंचाई निर्माण झाली आहे.”

तालुका आरोग्य अधिकाऱ्यांचे स्पष्टीकरण:
या संदर्भात तालुका आरोग्य अधिकारी, रघुवीर चंडेल यांनी सांगितले की, “आशा सेविका आणि गटप्रवर्तकांचे मानधन मागील आठ महिन्यांपासून बाकी आहे. बजेट अजून जमा झालेले नाही. ज्यावेळी बजेट येईल, त्यानंतर दोन दिवसांतच आशा सेविकांचे मानधन त्यांच्या खात्यावर जमा केले जाईल.”

आंदोलनाचा इशारा:
शासनाने येत्या आठ दिवसांत थकित मासिक मानधनासह वाढीव मानधन न दिल्यास, काम बंद आंदोलनाचा इशारा संतप्त आशा सेविकांनी दिला आहे. त्यांच्या या मागणीकडे शासनाचे कधी लक्ष जाते आणि त्यांच्या आर्थिक अडचणी कधी दूर होतात, हे पाहणे महत्त्वाचे ठरेल.