युवकांसाठी सुवर्णसंधी! प्रधानमंत्री इंटर्नशिप योजनेतून दरमहा मिळणार १९ हजार रुपये; जालन्यात भरती सुरू
By तेजराव दांडगे
युवकांसाठी सुवर्णसंधी! प्रधानमंत्री इंटर्नशिप योजनेतून दरमहा मिळणार १९ हजार रुपये; जालन्यात भरती सुरू
जालना (प्रतिनिधी): केंद्र शासनाच्या महत्त्वाकांक्षी ‘प्रधानमंत्री इंटर्नशिप योजने’ अंतर्गत जिल्ह्यातील युवक-युवतींना प्रत्यक्ष उद्योगांमध्ये कामाचा अनुभव घेण्याची मोठी संधी उपलब्ध झाली आहे. या योजनेत सहभागी होणाऱ्या पात्र उमेदवारांना प्रति महिना १९ हजार रुपये आर्थिक सहाय्य देण्यात येणार असून, जिल्हा कौशल्य विकास विभागाने जास्तीत जास्त तरुणांनी यात सहभागी होण्याचे आवाहन केले आहे.
योजनेचा मुख्य उद्देश
शिक्षण आणि प्रत्यक्ष उद्योग यांच्यातील दरी कमी करणे, तरुणांमध्ये प्रॅक्टिकल कौशल्य विकसित करणे आणि त्यांची रोजगार क्षमता वाढवणे हा या योजनेचा मुख्य उद्देश आहे. या माध्यमातून देशासाठी आणि उद्योगांसाठी कुशल मनुष्यबळ निर्माण करण्याचा प्रयत्न केला जात आहे.
पात्रता आणि लाभ
वयोगट: १८ ते २५ वर्षे वयोगटातील पात्र युवक-युवती या योजनेसाठी अर्ज करू शकतात.
कालावधी: निवड झालेल्या उमेदवारांना नामांकित उद्योगांमध्ये ६ ते ९ महिने प्रत्यक्ष कामाचा अनुभव घेता येईल.
मानधन: इंटर्नशिप दरम्यान उमेदवारांना दरमहा १९ हजार रुपयांचे आर्थिक सहाय्य दिले जाईल.
प्रमाणपत्र: यशस्वीरीत्या इंटर्नशिप पूर्ण केल्यानंतर उमेदवारांना अधिकृत अनुभव आणि सहभाग प्रमाणपत्र दिले जाईल, ज्याचा उपयोग भविष्यात कायमस्वरूपी नोकरी मिळवण्यासाठी होईल.
येथे साधा संपर्क
जिल्ह्यातील सुशिक्षित बेरोजगार युवक-युवतींनी या योजनेचा लाभ घेऊन आपल्या करिअरला नवी दिशा द्यावी, असे आवाहन सहाय्यक आयुक्त, जिल्हा कौशल्य विकास, रोजगार व उद्योजकता मार्गदर्शन केंद्र (मॉडेल करिअर सेंटर), जालना यांनी केले आहे.
अधिक माहितीसाठी इच्छुक उमेदवारांनी कार्यालयीन वेळेत जिल्हा कौशल्य विकास, रोजगार व उद्योजकता मार्गदर्शन केंद्र, जालना येथे प्रत्यक्ष भेट द्यावी.
