पारधजवळील पद्मावती शिवारात भीषण अपघात: कारच्या धडकेत दुचाकीस्वार जखमी, कार विहिरीत कोसळून दोन महिलांचा मृत्यू; चालकावर गुन्हा दाखल
By तेजराव दांडगे
पारधजवळील पद्मावती शिवारात भीषण अपघात: कारच्या धडकेत दुचाकीस्वार जखमी, कार विहिरीत कोसळून दोन महिलांचा मृत्यू; चालकावर गुन्हा दाखल
पारध बु. (विशेष प्रतिनिधी): भोकरदन तालुक्यातील पारध ते वालसावंगी रोडवर सुनील कोलते यांच्या शेताजवळ, पद्मावती शिवारात ७ ऑगस्टच्या रात्री ८:०० वाजेच्या सुमारास कार आणि दुचाकीचा भीषण अपघात घडला. भरधाव कारने दुचाकीला जोरदार धडक दिल्यानंतर चालकाचे नियंत्रण सुटल्याने कार रस्त्यालगतच्या विहिरीत कोसळली. या दुर्दैवी घटनेत विहिरीत बुडून दोन महिलांचा जागीच मृत्यू झाला, तर दुचाकीस्वार गंभीर जखमी झाला आहे.
भरधाव कारची दुचाकीला धडक; पोकलँड ऑपरेटर जखमी
मिळालेल्या माहितीनुसार, पद्मावती येथील रहिवासी व पोकलँड ऑपरेटर अरुण दामू शेवाळे (वय २५) हे आपल्या मोटारसायकलवरून जात असताना पारध ते वालसावंगी रोडवर कार क्रमांक MH 28 BD 7711 च्या चालकाने आपल्या ताब्यातील कार भरधाव, हयगयीने व निष्काळजीपणा चालवून त्यांच्या दुचाकीला जोरदार धडक दिली. या अपघातात अरुण शेवाळे हे जखमी झाले आहेत.
नियंत्रण सुटून कार विहिरीत; धावडा येथील दोन महिलांचा दुर्दैवी अंत
दुचाकीला धडक दिल्यानंतर कारचालकाचे वाहनावरील नियंत्रण सुटले आणि कार रस्त्यालगत असलेल्या खोल विहिरीत जाऊन कोसळली. कारमध्ये प्रवास करणाऱ्या धावडा येथील दोन महिलांचा विहिरीच्या पाण्यात बुडून दुर्दैवी मृत्यू झाला.
घटना घडल्यानंतर पोलीस व स्थानिक प्रशासनाने क्रेन आणि रेस्क्यू टीमच्या साह्याने मदतकार्य राबवून कार व महिलांचे मृतदेह विहिरीबाहेर काढले. कार चालकाच्या निष्काळजीपणामुळेच हा भीषण अपघात घडून दोन महिलांचा मृत्यू झाल्याचे निष्पन्न झाले आहे.
कारचालकाविरुद्ध विविध कलमांन्वये गुन्हा दाखल
याप्रकरणी जखमी दुचाकीस्वार अरुण दामू शेवाळे यांच्या फिर्यादीवरून पारध पोलीस ठाण्यात ८ ऑगस्ट २०२६ रोजी रात्री २२:०१ वाजता गुन्हा नोंद क्रमांक २२७/२०२६ नुसार कार चालक (वाह क्र. MH 28 BD 7711) याच्याविरुद्ध भारतीय न्याय संहिता (BNS) कलम २८१, १०६ (१), १२५ (अ) अन्वये गुन्हा दाखल करण्यात आला आहे.
माहितीनुसार हा गुन्हा पोलीस हवालदार जी. डी. भुतेकर (बॅच नं. १४०६) यांनी दाखल केला असून, प्रकरणाचा पुढील तपास पोलीस उपनिरीक्षक (PSI) वाल्मिक नेमाने करत आहेत.
