देवशयनी आषाढी एकादशी निमित्त राजेंद्रजी श्रीवास्तव इंग्लिश स्कूलच्या वतीने पायी दिंडीचे आयोजन
By तेजराव दांडगे
देवशयनी आषाढी एकादशी निमित्त राजेंद्रजी श्रीवास्तव इंग्लिश स्कूलच्या वतीने पायी दिंडीचे आयोजन
पारध बु. (ता. भोकरदन): येथील स्वर्गीय राजेंद्रजी श्रीवास्तव इंग्लिश स्कूल, कनिष्ठ व वरिष्ठ महाविद्यालयाच्या वतीने देवशयनी आषाढी एकादशीचे औचित्य साधून भव्य पायी दिंडीचे आयोजन करण्यात आले होते. या दिंडीमध्ये शाळेतील सर्व विद्यार्थी आणि शिक्षक वृंदांनी पारंपरिक वारकरी वेशभूषा परिधान करून उत्स्फूर्तपणे सहभाग घेतला.
दिंडीची सुरुवात शाळा परिसरापासून करण्यात आली. टाळ-मृदुंगाचा गजर आणि ‘ज्ञानबा-तुकाराम’ व ‘विठ्ठल विठ्ठल जय हरी विठ्ठल’ अशा विठ्ठल नामाच्या जयघोषाने संपूर्ण पारध परिसर दुमदुमून गेला होता. ही दिंडी शाळेपासून निघून गावातील प्रसिद्ध श्री पराशर महाराज मंदिरापर्यंत काढण्यात आली. यावेळी शाळेच्या विद्यार्थिनी प्राची फुसे आणि खुशी जाधव यांनी विठ्ठल-रुक्मिणीची अत्यंत देखणी वेशभूषा धारण केली होती, जी सर्वांच्या आकर्षणाचा केंद्रबिंदू ठरली.
“आजच्या विज्ञान युगात विद्यार्थ्यांना वैज्ञानिक दृष्टिकोनासोबतच अध्यात्माची जाणीव व्हावी, तसेच या स्पर्धात्मक युगात त्यांना आत्मशांती लाभावी आणि त्यांच्यात श्रद्धा, भक्ती व सामाजिक एकतेचा संदेश रुजावा, या पवित्र हेतूने या दिंडीचे आयोजन करण्यात आले होते,” असे प्रतिपादन शाळेचे मुख्याध्यापक सचिन लक्कस यांनी यावेळी केले.
हा सोहळा अत्यंत शिस्तबद्ध आणि उत्साही वातावरणात पार पडला. कार्यक्रम यशस्वीरित्या संपन्न करण्यासाठी शाळेतील सर्व शिक्षक आणि शिक्षकेतर कर्मचाऱ्यांनी परिश्रम घेतले व सक्रिय सहभाग नोंदवला. या उपक्रमाचे सर्व स्तरांतून कौतुक होत आहे.
