पारध पोलिसांची बेकायदेशीर दारू विक्रीविरोधात कारवाई; कल्याणी व हिसोडा फाटा परिसरातून दोघांवर गुन्हे दाखल
By तेजराव दांडगे
पारध पोलिसांची बेकायदेशीर दारू विक्रीविरोधात कारवाई; कल्याणी व हिसोडा फाटा परिसरातून दोघांवर गुन्हे दाखल
पारध बु. (विशेष प्रतिनिधी): पारध पोलीस ठाण्याच्या हद्दीत बेकायदेशीरपणे विनापरवाना देशी दारूची साठवणूक करून चोरटी विक्री करणाऱ्यांविरोधात पोलिसांनी धडक कारवाई केली आहे. १ ऑगस्ट रोजी सायंकाळी करण्यात आलेल्या दोन वेगवेगळ्या कारवायांमध्ये कल्याणी आणि हिसोडा फाटा येथून दोघांविरुद्ध महाराष्ट्र दारूबंदी कायद्यांतर्गत गुन्हे नोंदवण्यात आले आहेत.
पहिली कारवाई: कल्याणी येथे पाण्याच्या टाकीजवळ कारवाई
पहिली कारवाई कल्याणी ते वाकडी जाणाऱ्या रस्त्यालगत पाण्याच्या टाकीसमोर करण्यात आली. १ ऑगस्ट रोजी सायंकाळी ६:५० वाजेच्या सुमारास गरबडसिंग भाऊलाल चांदा (वय ५३, रा. कल्याणी, ता. भोकरदन) हा इसम बेकायदेशीरपणे विक्रीच्या उद्देशाने दारू ताब्यात बाळगताना आढळला.
याप्रकरणी पोलीस शिपाई गुलाबराव पुजाजी आव्हाड (बॅच नं. १६८१) यांच्या फिर्यादीवरून पारध पोलीस ठाण्यात गुन्हा नोंद क्रमांक २२१/२०२६ नुसार कलम ६५ (अ) (ई) महाराष्ट्र दारूबंदी अधिनियमांतर्गत गुन्हा दाखल करण्यात आला आहे.
दुसरी कारवाई: हिसोडा फाट्यावरून देशी दारूचा साठा जप्त
दुसरी कारवाई सायंकाळी ७:३० वाजेच्या सुमारास हिसोडा फाट्यावरील रस्त्यालगत असलेल्या टिनपत्र्याच्या शेडजवळ करण्यात आली. मनोज दादाराव जगताप (वय ४९, रा. शिवणा, ता. सिल्लोड, जि. छत्रपती संभाजीनगर) हा इसम हातात वायरच्या पिशवीत बेकायदेशीर दारू बाळगताना पोलिसांना आढळून आला.
त्याच्याकडून प्रत्येकी १०० रुपये किमतीच्या ‘देशी दारू भिंगरी संत्रा’च्या १० सीलबंद बाटल्या (एकूण १,००० रुपये किमतीचा माल) जप्त करण्यात आल्या. याप्रकरणी गुन्हा नोंद क्रमांक २२२/२०२६ नुसार कलम ६५ (अ) (ई) महाराष्ट्र दारूबंदी अधिनियमांतर्गत दुसरा गुन्हा नोंदवण्यात आला आहे.
पुढील तपास सुरू
सहाय्यक पोलीस निरीक्षक (API) यांच्या आदेशानुसार दोन्ही गुन्ह्यांची नोंद पोलीस अंमलदार एस. सी. खिल्लारे यांनी केली असून, पुढील तपास पोलीस शिपाई एस. जी. जाधव करत आहेत. बेकायदेशीर दारू विक्री करणाऱ्यांविरोधात पारध पोलिसांची ही कारवाई सुरूच राहणार असल्याचे प्रशासनाकडून सांगण्यात आले आहे.
