जालना: चंदनझिरा पोलिसांची कारवाई; हायवेवर दुचाकीवरून अवैध दारूची वाहतूक करणारा तरुण जेरबंद
By तेजराव दांडगे
जालना: चंदनझिरा पोलिसांची कारवाई; हायवेवर दुचाकीवरून अवैध दारूची वाहतूक करणारा तरुण जेरबंद
जालना: जिल्ह्यात अवैध धंद्यांविरुद्ध सुरू असलेल्या मोहिमेतंर्गत चंदनझिरा पोलिसांनी छत्रपती संभाजीनगर हायवेवर एक मोठी यशस्वी कारवाई केली आहे. हायवेवरील कीर्ती ट्रान्सपोर्टसमोर बेकायदेशीररित्या दुचाकीवरून देशी-विदेशी दारूची चोरटी वाहतूक करणाऱ्या एका २१ वर्षीय तरुणाला पोलिसांनी रंगेहात पकडले. या कारवाईत पोलिसांनी वाहनासह १ लाख १२ हजार ६०० रुपयांचा मुद्देमाल जप्त केला असून चंदनझिरा पोलीस ठाण्यात गुन्हा दाखल करण्यात आला आहे.
मिळालेल्या माहितीनुसार, जालना जिल्ह्याचे पोलीस अधीक्षक तेघबीर सिंह संधू आणि अप्पर पोलीस अधीक्षक विक्रम साळी यांनी चंदनझिरा पोलीस ठाण्याचे पोलीस निरीक्षक (पोनी) बाळासाहेब पवार यांना अवैध दारू साठ्यांवर कडक कारवाई करण्याचे आदेश दिले होते. या आदेशान्वये पोलीस पथकाने मिळालेल्या खात्रीशीर बातमीच्या आधारे छत्रपती संभाजीनगर हायवेवरील कीर्ती ट्रान्सपोर्ट समोर सापळा रचला.
दुपारी ३ वाजता टाकला छापा
२६ मे २०२६ रोजी दुपारी ३ वाजेच्या सुमारास पोलिसांनी सदर ठिकाणी छापा टाकला. यावेळी आरोपी योगेश वामेश्वर पिसार (वय २१ वर्ष, रा. सरस्वती मंदिर रोड, खरपुडी, जालना) हा आपल्या ताब्यातील काळ्या रंगाच्या ॲक्टिव्हा दुचाकीवरून (क्रमांक MH-21-BL-5448) विनापरवाना बेकायदेशीररित्या देशी व विदेशी दारूच्या बाटल्या चोरटी विक्री करण्याच्या उद्देशाने वाहतूक करताना मिळून आला.
लाख रुपयांपेक्षा जास्त मुद्देमाल जप्त
पोलिसांनी आरोपीच्या ताब्यातून विविध नामांकित कंपन्यांच्या देशी, विदेशी दारूच्या आणि बिअरच्या बाटल्यांसह वाहतुकीसाठी वापरलेली ७५ हजार रुपये किमतीची ॲक्टिव्हा दुचाकी, असा एकूण १,१२,६०० रुपयांचा मुद्देमाल जप्त केला आहे.
याप्रकरणी चंदनझिरा पोलीस ठाण्यात आरोपीविरुद्ध गुन्हा रजिस्टर नंबर ३४३/२०२६ कलम ६५ (अ) (ई), महाराष्ट्र दारूबंदी कायद्यान्वये गुन्हा दाखल करण्यात आला आहे. या गुन्ह्याचा पुढील तपास पोलीस हेड कॉन्स्टेबल (पोहेकॉ/४५७) देशमुख करत आहेत.
या पथकाने केली कारवाई:
सदरची धडक कारवाई पोलीस अधीक्षक तेघबीर सिंह संधू, अप्पर पोलीस अधीक्षक विक्रम साळी यांच्या मार्गदर्शनाखाली चंदनझिरा पोलीस ठाण्याचे पोनी बाळासाहेब पवार, पोलीस उपनिरीक्षक (पोउपनि) स्कॉट, पोउपनि देशमाने, पोउपनि सय्यद, पोहेकॉ/४५७ देशमुख, पोहेकॉ/१३५२ वायकोस आणि पोलीस कॉन्स्टेबल (पोकॉ/३०१) सागर खैरे यांच्या पथकाने केली.
