जालना: वन विभागात नोकरीचे आमिष दाखवून ४ लाखांना गंडा; ‘पिक्स आर्ट’वर बनावट आदेश तयार करणारे दोघे एलसीबीच्या ताब्यात, ३ लाखांचा मुद्देमाल जप्त
By तेजराव दांडगे
जालना: वन विभागात नोकरीचे आमिष दाखवून ४ लाखांना गंडा; ‘पिक्स आर्ट’वर बनावट आदेश तयार करणारे दोघे एलसीबीच्या ताब्यात, ३ लाखांचा मुद्देमाल जप्त
जालना (विशेष प्रतिनिधी): वन खात्यामध्ये (Forest Department) नोकरी लावून देण्याचे आमिष दाखवून ४ लाख रुपये उकळत प्रशिक्षणाचे बनावट आदेश देणाऱ्या आंतरजिल्हा टोळीचा जालना स्थानिक गुन्हे शाखेने (LCB) पर्दाफाश केला आहे. या प्रकरणी पोलिसांनी दोन आरोपींना नाव्हा चौफुली परिसरातून ताब्यात घेतले असून, त्यांच्याकडून नगदी रोकड, मोटारसायकल आणि मोबाईल असा एकूण ३ लाख ५ हजार रुपयांचा मुद्देमाल जप्त केला आहे.
असा उघडकीस आला प्रकार:
तक्रारदार उमेश विजयकुमार जाधव (रा. खांडवी, ता. परतूर, जि. जालना) यांना संशयित आरोपींनी वन विभागात नोकरी लावण्याचे आमिष दाखवले होते. यासाठी एकूण १५ लाख रुपयांचा व्यवहार ठरला होता. त्यापैकी पहिला टप्पा म्हणून तक्रारदाराने संशयितांना ४ लाख रुपये दिले. पैसे मिळाल्यानंतर आरोपींनी त्यांना प्रशिक्षणाचे आदेश पत्र दिले, मात्र ते बनावट असल्याचे लक्षात येताच आपली फसवणूक झाल्याचे तक्रारदाराच्या निदर्शनास आले. याप्रकरणी त्यांनी जालना येथील सदर बाजार पोलीस ठाण्यात तक्रार दाखल केली होती.
मोबाईल ॲपच्या मदतीने बनवले बनावट पत्र:
गुन्ह्याचे गांभीर्य ओळखून जालना जिल्हा पोलीस अधीक्षक तेघबीर सिंह संधू यांनी स्थानिक गुन्हे शाखेला (LCB) तपास करण्याचे आदेश दिले होते. एलसीबीच्या पथकाने तांत्रिक विश्लेषणाच्या आधारे शोध घेतला असता, दोन्ही संशयित नाव्हा चौफुली परिसरात मिळून आले.
पोलिसांनी त्यांची कसून चौकशी केली असता, संशयित आरोपी राहुल कदम याने त्याच्या मोबाईलमधील ‘पिक्स आर्ट’ (PicsArt) या फोटो एडिटिंग ॲप्लिकेशनच्या साहाय्याने वन विभागाचे बनावट प्रशिक्षण आदेश पत्र तयार केले होते. त्यानंतर निलेश झाटे याच्या व्हॉट्सॲपवरून ते पत्र तक्रारदाराला पाठवून त्यांचा विश्वास संपादन केला व फसवणूक केल्याची कबुली दोघांनी दिली.
अटक केलेले आरोपीत :
१) निलेश गोविंदा झाटे (वय २९ वर्षे, रा. वसाली, ता. पातुर, जि. अकोला)
२) रहुल गजानन कदम (वय २६ वर्षे, रा. जनुना, ता. मेहकर, जि. बुलढाणा)
जप्त करण्यात आलेला मुद्देमाल:
रोख रक्कम: १,४५,००० रुपये रोख.
वाहन: गुन्ह्यात वापरलेली १,४०,००० रुपये किमतीची पल्सर मोटारसायकल.
मोबाईल: बनावट पत्र तयार करण्यासाठी वापरलेले २०,००० रुपये किमतीचे दोन मोबाईल फोन.
एकूण मुद्देमाल: ३,०५,००० रुपये.
कारवाई करणारे पथक:
ही धडक कारवाई पोलीस अधीक्षक तेघबीर सिंह संधू, अपर पोलीस अधीक्षक विक्रम साळी, उपविभागीय पोलीस अधिकारी अनंत कुलकर्णी आणि स्थानिक गुन्हे शाखेचे पोलीस निरीक्षक पंकज जाधव यांच्या मार्गदर्शनाखाली करण्यात आली. यामध्ये एलसीबीचे सपोनि. सचिन खामगळ, पोउपनि राजेंद्र वाघ, जगदीश बावणे, कैलास खार्डे, दीपक घुगे, रुस्तुम जैवाळ, अक्नुर धांडगे, कैलास चेके आणि सोपान क्षीरसागर यांनी महत्त्वपूर्ण भूमिका बजावली.
