Jalna: पारध रस्त्यावरून रणकंदन! विद्यार्थी, पालक, शेतकरी संतप्त; राजकीय नेत्यांकडून आंदोलनाचा इशारा

Jalna: पारध रस्त्यावरून रणकंदन! विद्यार्थी, पालक, शेतकरी संतप्त; राजकीय नेत्यांकडून आंदोलनाचा इशारा

जालना, दि. ०७ जुलै: जालना जिल्ह्यातील भोकरदन तालुक्यातील पारध बुद्रुक येथील रस्त्यांच्या दुरवस्थेने नागरिक अक्षरशः त्रस्त झाले आहेत. आज सकाळी ९ वाजता D9 न्यूजवर झालेल्या एका विशेष लाईव्ह संवादात ज्येष्ठ पत्रकार रवी लोखंडे यांनी हा ज्वलंत मुद्दा पुन्हा एकदा ऐरणीवर आणला. या लाईव्ह सत्रात विद्यार्थी, पालक, शेतकरी, तसेच जिल्हा परिषद शाळेचे माजी मुख्याध्यापक अझहर पठाण, पत्रकार सागर देशमुख, तेजराव दांडगे, ग्रामस्थ उमेश लोखंडे यांच्यासह अनेक नागरिकांनी रस्त्यांच्या बिकट स्थितीबद्दल तीव्र नाराजी व्यक्त केली. प्रशासनाच्या अक्षम्य दुर्लक्षामुळे होणाऱ्या त्रासावर सर्वांनी परखड प्रतिक्रिया देत तातडीने रस्त्यांची दुरुस्ती करण्याची मागणी केली, ज्यामुळे प्रशासकीय उदासीनतेचा प्रश्न पुन्हा एकदा चर्चेत आला आहे.

‘लोळून’ आंदोलन करण्याची बबलू तेलंग्रे यांची गर्जना!
याच लाईव्ह संवादात शिवसेना शिंदे गटाचे उपतालुका प्रमुख बबलू तेलंग्रे यांनी प्रशासनाला थेट इशारा दिला. “जर संबंधित प्रशासनाने हा रस्ता लवकरच पूर्ण केला नाही, तर आम्ही याच रस्त्यावर लोळून आंदोलन करू,” असे ठणकावून सांगत तेलंग्रे यांनी रस्त्याच्या कामाची तातडीची गरज अधोरेखित केली.

उबाठा गटाचे मनीष श्रीवास्तव यांचा ‘अवघड’ खुलासा!
लाईव्ह प्रतिक्रिया पाहून उबाठा गटाचे उपजिल्हाप्रमुख मनीष श्रीवास्तव यांनी अवघडराव सावंगी रस्त्याबाबत एक धक्कादायक खुलासा केला. “सावंगी ते पारध बुद्रुक हा रस्ता सार्वजनिक बांधकाम विभागाने जनता विद्यालयापर्यंत आणून सोडला आहे. पण, जनता विद्यालयाच्या कोपऱ्यापासून अवघ्या ३०० मीटरचा रस्ता त्यांनी जाणीवपूर्वक सोडून दिला आहे,” असे श्री श्रीवास्तव यांनी स्पष्ट केले. हा रस्ता ग्रामपंचायत करू शकत नाही, कारण तो मुख्यमंत्री ग्राम सडक योजनेखाली येतो. या रस्त्यावर साधा दगड टाकायचा असला तरी संबंधित प्रशासनाची परवानगी लागते आणि ना हरकत प्रमाणपत्र (NOC) मिळाल्याशिवाय ग्रामपंचायतीला हे काम करता येत नाही, असे त्यांनी स्पष्ट केले. येत्या काही दिवसांत हा रस्ता पूर्ण न झाल्यास उबाठा गट रस्त्यावर उतरून आंदोलन करेल, असा इशाराही त्यांनी दिला.

याव्यतिरिक्त, श्री श्रीवास्तव यांनी पारध ते धामणगाव दरम्यानच्या ८०० मीटर रस्त्याचाही मुद्दा उचलला. “सार्वजनिक बांधकाम विभागाने हा रस्ता केवळ उकरून ठेवला आहे. आम्ही त्यांना सांगितले की, तुम्ही तुमची हद्द कायम करून दुतर्फा नालीसाठी फक्त चारी करून द्या. जर त्यांची आर्थिक परिस्थिती नाजूक असेल, तर उर्वरित नालीचे काम आम्ही ग्रामपंचायतीच्या माध्यमातून करू. पण त्यांनी तेही केले नाही, त्यामुळे या रस्त्याचे कामही अपूर्णच राहिले आहे,” असे श्री श्रीवास्तव यांनी नमूद केले.

माजी सभापती परमेश्वर लोखंडे यांची ‘लबाड लांडगा’ उपमा!
या सर्व घडामोडींवर माजी पंचायत समिती सभापती परमेश्वर लोखंडे यांनी सोशल मीडियावरुन आपली तीव्र प्रतिक्रिया दिली. त्यांनी सुरुवातीला हा रस्त्याचा महत्त्वाचा मुद्दा उचलल्याबद्दल सर्व पत्रकारांचे आभार मानले. मात्र, त्यानंतर त्यांनी पारध ग्रामपंचायतीची अवस्था “लबाड लांडगा ढोंग करतंय” अशी झाल्याचे सांगत तीव्र शब्दांत नाराजी व्यक्त केली.

“मागील १० वर्षांपासून या गोरगरिबांच्या लेकरांसाठी शाळेच्या गेटसमोर ५० फूट रस्ता जरी बनवला असता, तरी त्यांना शाळेत जाण्यासाठी अडचण झाली नसती. परंतु ग्रामपंचायत जाणीवपूर्वक टाळाटाळ करत आहे,” असा गंभीर आरोप श्री लोखंडे यांनी केला. त्यांनी आठवण करून दिली की, यापूर्वी त्यांच्या कार्यकाळात ग्रामपंचायतीच्या माध्यमातून सिमेंट-काँक्रीट रस्ता बनवला होता. “या रस्त्याने जाणारे शेतकरी किंवा पालकांनी सांगावे की, दहा वर्षांपूर्वी आम्ही ग्रामपंचायतीच्या माध्यमातून हा रोड केला होता की नाही,” असा सवाल लोखंडे यांनी सोशल मीडियाच्या माध्यमातून उपस्थित करत ग्रामपंचायतीच्या सध्याच्या कार्यपद्धतीवरच प्रश्नचिन्ह निर्माण केले.

एकंदरीत, पारध रस्त्याच्या दुरावस्थेवरुन नागरिक आणि राजकीय नेते संतप्त झाले असून, येत्या काळात या मुद्द्यावरून तीव्र आंदोलन होण्याची शक्यता वर्तवली जात आहे. आता या जनआंदोलनाचा आणि नेत्यांच्या इशाऱ्याचा प्रशासनावर किती परिणाम होतो आणि ते या समस्येवर कधी तोडगा काढतात, हे पाहणे महत्त्वाचे ठरेल.