महिलेचा विनयभंग करणाऱ्या आरोपीस एक वर्ष सश्रम कारावास आणि २० हजार रुपये दंड; भोकरदन न्यायालयाचा निकाल
By तेजराव दांडगे
महिलेचा विनयभंग करणाऱ्या आरोपीस एक वर्ष सश्रम कारावास आणि २० हजार रुपये दंड; भोकरदन न्यायालयाचा निकाल
पारध (प्रतिनिधी – तेजराव दांडगे): लॉकडाउन काळात एका महिलेचा विनयभंग करून तिला जीवे मारण्याची धमकी देणाऱ्या आरोपीला भोकरदन न्यायालयाने कठोर शिक्षा सुनावली आहे. आरोपी रमेश अशोक साळवे (रा. जानेफळ गायकवाड, ता. भोकरदन) याला एक वर्ष सश्रम कारावास आणि २० हजार रुपये दंडाची शिक्षा सुनावण्यात आली आहे.
नेमकी घटना काय?
सन २०२० मध्ये संपूर्ण देशात लॉकडाउन लागू असताना ही घटना घडली होती. आरोपी रमेश साळवे याने पीडित महिलेला अडवून अश्लील वक्तव्य करत तिचा विनयभंग केला होता. तसेच हे कृत्य कोणाला सांगितल्यास जीवे मारण्याची धमकी देऊन तिला मारहाण व शिवीगाळ केली होती. याप्रकरणी पीडित महिलेने धाडस दाखवून पारध पोलीस ठाण्यात तक्रार दाखल केली होती. त्यावरून भादंवि कलम ३५४, ३२३, ५०४ आणि ५०६ अन्वये गुन्हा दाखल करण्यात आला होता.
तपास अधिकाऱ्यांची कामगिरी
सदर गुन्ह्याचा तपास पोलीस हवालदार प्रकाश सिनकर यांच्याकडे सोपवण्यात आला होता. कोरोनाचा प्रादुर्भाव असतानाही सिनकर यांनी गुन्ह्याचे गांभीर्य ओळखून सर्व आवश्यक पुरावे गोळा केले आणि भोकरदन न्यायालयात दोषारोपपत्र दाखल केले. तपासादरम्यान गोळा केलेले तांत्रिक पुरावे आणि प्रत्यक्षदर्शींची साक्ष न्यायालयात महत्त्वाची ठरली.
न्यायालयाचा निकाल
प्रथम वर्ग न्यायदंडाधिकारी श्री. मयुरेश आर. काळे यांच्या समोर या प्रकरणाची सुनावणी झाली. दोन्ही पक्षांचा युक्तिवाद आणि साक्षीदारांचे जबाब नोंदवल्यानंतर, आरोपीविरुद्धचे गुन्हे सिद्ध झाले. न्यायालयाने आरोपी रमेश साळवे याला एक वर्षाचा सश्रम कारावास सुनावला असून, २० हजार रुपयांचा दंड पीडित महिलेला नुकसानभरपाई म्हणून देण्याचे आदेश दिले आहेत.
यंत्रणेचे प्रयत्न
या प्रकरणात सरकारी वकील अभय एन. गवळी यांनी सरकार पक्षाची बाजू समर्थपणे मांडली. त्यांना कोर्ट पैरवी म्हणून पोलीस अंमलदार संगीता मोकाशे यांनी सहकार्य केले.
जालना जिल्ह्याचे पोलीस अधीक्षक अजय कुमार बन्सल, अपर पोलीस अधीक्षक आयुष नोपानी, उपविभागीय पोलीस अधिकारी डॉ. नितीन कटेकर यांच्या मार्गदर्शनाखाली आणि पारध पोलीस ठाण्याचे प्रभारी अधिकारी संतोष माने यांच्या नेतृत्वाखाली ही यशस्वी कायदेशीर कारवाई पूर्ण झाली आहे.
