बनावट ‘प्रोडक्शन मॅनेजर’ बनून कर्नाटकच्या शेतकऱ्याला लुटणाऱ्या टोळीचा पर्दाफाश; स्थानिक गुन्हे शाखेची मोठी कारवाई
By तेजराव दांडगे
बनावट ‘प्रोडक्शन मॅनेजर’ बनून कर्नाटकच्या शेतकऱ्याला लुटणाऱ्या टोळीचा पर्दाफाश; स्थानिक गुन्हे शाखेची मोठी कारवाई
जालना (प्रतिनिधी – तेजराव दांडगे): नामांकित बियाणे कंपनीचे ‘प्रोडक्शन मॅनेजर’ असल्याचे भासवून कर्नाटक राज्यातील एका शेतकऱ्याची फसवणूक आणि लूट करणाऱ्या दोन आरोपीतांना जालना स्थानिक गुन्हे शाखेने अवघ्या काही तासांत बेड्या ठोकल्या आहेत. आरोपीतांकडून २१ लाख ३८ हजार ८०० रुपयांचा मुद्देमाल जप्त करण्यात आला आहे.
नेमकी घटना काय?
कर्नाटक राज्यातील हावेरी जिल्ह्यातील ब्याडगी येथील शेतकरी लोकेश देवेद्रअप्पा इलेगर यांना दोन अनोळखी इसमांनी झेंडूचे बियाणे विकत घेण्याच्या बहाण्याने जालना येथे बोलावले होते. आरोपींनी आपण एका मोठ्या बियाणे कंपनीत मॅनेजर असल्याचे सांगितले. १८ एप्रिल रोजी जालना येथील सेंट मेरी हायस्कूलसमोर व्यवहार ठरला. यावेळी आरोपींनी लोकेश यांच्याकडील १७ किलो ७०० ग्रॅम वजनाचे (किंमत ७ लाख ७८ हजार ८०० रुपये) झेंडूचे बियाणे ताब्यात घेतले. त्यानंतर लोकेश यांना दुचाकीवर बसवून थोड्या अंतरावर नेले आणि धक्का देऊन खाली पाडत बियाणे घेऊन पोबारा केला. याप्रकरणी सदर बाजार पोलीस ठाण्यात गुन्हा दाखल करण्यात आला होता.
पोलीस अधीक्षकांच्या सूचना आणि वेगाने तपास
घटनेचे गांभीर्य लक्षात घेऊन पोलीस अधीक्षक अजय कुमार बन्सल यांनी स्थानिक गुन्हे शाखेचे पोलीस निरीक्षक पंकज जाधव यांना तात्काळ तपासाच्या सूचना दिल्या. एलसीबीच्या पथकाने तांत्रिक विश्लेषण आणि गुप्त बातमीदारांच्या मदतीने आरोपीतांचा शोध सुरू केला.
कन्हैय्यानगर येथे सापळा रचून अटक
आरोपी एका काळ्या रंगाच्या बोलेरो कारमधून देऊळगाव राजाकडून जालन्याकडे येत असल्याची माहिती मिळताच, पोलिसांनी कन्हैय्यानगर येथे सापळा रचला. पोलिसांनी शिताफीने दोन आरोपीतांना ताब्यात घेतले.
अटक केलेल्या आरोपीतांची नावे:
१) सुनील बाबासाहेब जगताप (वय १९, रा. निवडुंगा, ता. जाफ्राबाद)
२) वैभव पांडुरंग जगताप (वय २३, रा. निवडुंगा, ता. जाफ्राबाद)
दोन्ही आरोपीत बियाणे खरेदी-विक्रीचा व्यवसाय करतात. चौकशीदरम्यान त्यांनी गुन्ह्याची कबुली दिली आहे.
मुद्देमाल जप्त
पोलिसांनी आरोपीतांकडून जबरी चोरी केलेले संपूर्ण १७ किलो ७०० ग्रॅम बियाणे, गुन्ह्यात वापरलेली बोलेरो कार आणि मोबाईल असा एकूण २१ लाख ३८ हजार ८०० रुपयांचा मुद्देमाल हस्तगत केला आहे.
या पथकाने केली कारवाई
ही कामगिरी पोलीस अधीक्षक अजय कुमार बन्सल, अपर पोलीस अधीक्षक आयुष नोपाणी, उपविभागीय पोलीस अधिकारी अनंत कुलकर्णी यांच्या मार्गदर्शनाखाली पोलीस निरीक्षक पंकज जाधव, सपोनि सचिन खामगळ, पोउपनि राजेंद्र वाघ आणि अंमलदार सागर बाविस्कर, इरशाद पटेल, देविदास भोजने, आक्रूर धांडगे, सौरभ मुळे यांच्या पथकाने केली.
