पत्रकारितेच्या नावाखाली ब्लॅकमेलिंग; जालन्यातील खाजगी हॉस्पिटलकडून खंडणी उकळणाऱ्या दोघांना अटक!
By गौतम वाघ
पत्रकारितेच्या नावाखाली ब्लॅकमेलिंग; जालन्यातील खाजगी हॉस्पिटलकडून खंडणी उकळणाऱ्या दोघांना अटक!
जालना (विशेष प्रतिनिधी): यूट्यूब चॅनल आणि सोशल मीडिया न्यूज पेजच्या नावाखाली खाजगी रुग्णालयाला बदनामीची धमकी देऊन १० हजार रुपयांची खंडणी उकळणाऱ्या दोघांना कदीम जालना पोलिसांनी तात्काळ कारवाई करत जेरबंद केले आहे. स्वतःला पत्रकार सांगून व्यापाऱ्यांना व डॉक्टरांना ब्लॅकमेल करणाऱ्यांवर पोलिसांच्या या कारवाईमुळे मोठा दणका बसला आहे.
बदनामीची धमकी देऊन १० हजारांची उकळत
पोलीस सूत्रांकडून मिळालेल्या सविस्तर माहितीनुसार, अंबड-मंठा बायपास रोडवरील ‘संजीवनी मल्टिस्पेशालिटी हॉस्पिटल’ चे डॉक्टर बळीराम बागल यांनी या प्रकरणी कदीम जालना पोलीस ठाण्यात अधिकृत तक्रार नोंदवली होती.
यूट्यूबवर ‘NK News’ (एनके न्यूज) नावाचे चॅनल चालवणाऱ्या आरोपीतांनी हॉस्पिटलची बदनामी करणारी एक पोस्ट/व्हिडिओ सोशल मीडियावर अपलोड केला होता. त्यानंतर आरोपीतांनी डॉ. बागल यांच्याशी संपर्क साधून स्वतः पत्रकार असल्याचे भासवले. “तुमच्या हॉस्पिटलविरोधात तक्रार आहे, ही पोस्ट व्हायरल करून कायदेशीर कारवाईत अडकवू,” अशी धमकी त्यांनी दिली. ही पोस्ट डिलीट करण्यासाठी आणि बदनामी रोखण्यासाठी आरोपीतांनी हॉस्पिटलच्या एचआर मॅनेजरकडून १० हजार रुपयांची रक्कम उकळली. पैसे मिळाल्यानंतर आरोपीतांनी ती पोस्ट सोशल मीडियावरून हटवली.
कदीम पोलिसांची धडक कारवाई; ‘या’ कलमांनुसार गुन्हा दाखल
डॉ. बागल यांच्या तक्रारीचे गांभीर्य लक्षात घेऊन कदीम जालना पोलिसांनी तपासाची चक्रे वेगाने फिरवून दोन्ही आरोपीतांना ताब्यात घेतले.
अटक आरोपीत: निकिता काळे आणि सतीश सुरवैये (सचिन सर्वे) (दोघे रा. जालना)
दाखल कलमे: आरोपीतांवर भारतीय न्याय संहिता (BNS) मधील खालील कलमांनुसार गुन्हा दाखल करण्यात आला आहे:
कलम ३०८ (२): खंडणी उकळणे (Extortion)
कलम ३५६ (२): बदनामी करणे (Defamation)
कलम ३५१ (२): गुन्हेगारी स्वरूपाची धमकी देणे (Criminal Intimidation)
D9 News Marathi ची भूमिका
पत्रकारिता हा लोकशाहीचा चौथा स्तंभ आहे. मात्र, यूट्यूब चॅनल किंवा सोशल मीडिया न्यूज पेजच्या नावाखाली ओळखपत्रांचा गैरवापर करून ब्लॅकमेलिंग आणि खंडणी उकळणे हे पत्रकारिता क्षेत्राला कलंकित करणारे आहे. D9 News Marathi अशा कोणत्याही गैरप्रकाराचा तीव्र निषेध करते आणि नेहमी कायदेशीर व जबाबदार पत्रकारितेच्या पाठीशी उभी राहते.
