भोकरदन पोलिसांची मोठी कारवाई: दोन मंदिरांतील चोरीचा गुन्हा उघडकीस; दोन आरोपी अटकेत
By तेजराव दांडगे
भोकरदन पोलिसांची मोठी कारवाई: दोन मंदिरांतील चोरीचा गुन्हा उघडकीस; दोन आरोपीत अटकेत
भोकरदन (प्रतिनिधी): भोकरदन पोलीस ठाण्याच्या हद्दीतील मुठाड व तांदुळवाडी येथील प्रसिद्ध मंदिरांमध्ये झालेल्या चोरीचा छडा लावण्यात भोकरदन पोलिसांना यश आले आहे. या प्रकरणी पोलिसांनी दोन आरोपीतांना अटक केली असून त्यांच्याकडून चोरीचा मुद्देमाल आणि एक दुचाकी जप्त केली आहे.
नेमकी घटना काय?
मिळालेल्या माहितीनुसार, २४ सप्टेंबर रोजी रात्री मुठाड येथील श्री देवी माता मंदिर आणि तांदुळवाडी येथील श्री विठ्ठल-रुख्मिणी मंदिरात अज्ञात चोरट्यांनी घरफोडी केली होती. चोरट्यांनी मंदिरातील चांदीचा मुकुट, सोन्याची नथ, मंगळसूत्र आणि रोख रक्कम असा एकूण ३०,० वर रुपयांचा मुद्देमाल लांबवला होता. या प्रकरणी भोकरदन पोलीस ठाण्यात भारतीय न्याय संहिता (BNS) कलम ३०५ अंतर्गत गुन्हा दाखल करण्यात आला होता.
गुप्त माहितीवरून आरोपीतांना बेड्या
गुन्ह्याचे गांभीर्य ओळखून प्रभारी अधिकारी संतोष माने यांच्या मार्गदर्शनाखाली पोलीस उपनिरीक्षक सागर शिंदे आणि पोलीस हवालदार दाभाडे यांच्या पथकाने वेगाने तपास सुरू केला.
तपासादरम्यान पोलिसांना गोपनीय बातमीदाराकडून माहिती मिळाली की, कन्नड शहरात दोन संशयित इसम चोरीचे दागिने विकण्यासाठी आले आहेत. या माहितीच्या आधारे पोलिसांनी कन्नड शहरात जाऊन सापळा रचला आणि दोन्ही संशयितांना ताब्यात घेतले.
निष्पन्न झालेले आरोपीत:
१) गोकुळ जगन जाधव (रा. गुदमा तांडा, ता. कन्नड, जि. छत्रपती संभाजीनगर)
२) करण उत्तम राठोड (रा. गुदमा तांडा, ता. कन्नड, जि. छत्रपती संभाजीनगर)
चोरीचा मुद्देमाल व दुचाकी जप्त
दोन्ही आरोपीतांना न्यायालयात हजर केले असता मा. न्यायालयाने त्यांना पोलीस कोठडी सुनावली. पोलीस कोठडीदरम्यान आरोपीतांची कसून चौकशी केली असता त्यांच्याकडून १०,००० रुपये किमतीचा चांदीचा मुकुट जप्त करण्यात आला. यासोबतच आरोपीतांनी अमरावती येथून चोरी केलेली अंदाजे ३०,००० रुपये किमतीची होंडा शाईन मोटारसायकल (दुचाकी) देखील पोलिसांनी जप्त केली आहे.
या दोन्ही आरोपीतांकडून इतरही गुन्ह्यांची उकल होण्याची शक्यता असून पोलीस पुढील तपास करत आहेत.
तपास पथकाची कामगिरी
ही धडक कारवाई पोलीस अधीक्षक तेगबीरसिंह संधु, अपर पोलीस अधीक्षक डॉ. विक्रम साळी, उपविभागीय पोलीस अधिकारी डॉ. नितीन कटेकर आणि प्रभारी अधिकारी संतोष माने यांच्या मार्गदर्शनाखाली पोलीस उपनिरीक्षक सागर शिंदे, पोलीस हवालदार योगेश दाभाडे व पोलीस अंमलदार योगेश गवळी यांच्या पथकाने केली. पोलिसांच्या या कामगिरीबद्दल नागरिकांमधून समाधान व्यक्त केले जात आहे.
