माणुसकीचे दर्शन! चुकून खात्यावर आलेले ४ लाख रुपये पारधच्या रईस शाह यांनी केले परत; प्रामाणिकपणाचा आदर्श
By तेजराव दांडगे
माणुसकीचे दर्शन! चुकून खात्यावर आलेले ४ लाख रुपये पारधच्या रईस शाह यांनी केले परत; प्रामाणिकपणाचा आदर्श
पारध (विशेष प्रतिनिधी): आजच्या धावपळीच्या आणि स्वार्थी जगात जिथे माणूस पैशांमागे धावत आहे, तिथे भोकरदन तालुक्यातील पारध खुर्द येथील एका तरुणाने प्रामाणिकपणाचा एक उत्तम वस्तुपाठ घालून दिला आहे. आपल्या बँक खात्यावर चुकून जमा झालेले तब्बल ४ लाख रुपये रईस शाह यांनी कोणतीही लालूच न धरता मूळ मालकाला परत करत माणुसकीचे दर्शन घडवले आहे.
नेमकी घटना काय?
मिळालेल्या माहितीनुसार, मुंगसे मार्केट (माळेगाव) येथील रहिवासी आणि व्यावसायिक निलेश साळुंखे हे एक व्यवहार करत होते. यादरम्यान, तांत्रिक चुकीमुळे त्यांच्या खात्यातून ४ लाख रुपयांची मोठी रक्कम पारध खुर्द येथील रईस शाह यांच्या खात्यावर जमा झाली. रक्कम मोठी असल्याने आणि व्यवहार चुकीच्या व्यक्तीसोबत झाल्याचे लक्षात येताच निलेश साळुंखे अत्यंत चिंतेत पडले होते.
लालूच नाही, फक्त प्रामाणिकपणा!
जेव्हा रईस शाह यांना त्यांच्या खात्यात अचानक मोठी रक्कम जमा झाल्याचा संदेश आला, तेव्हा त्यांनी या पैशांचा मोह धरला नाही. त्यांनी तातडीने निलेश साळुंखे यांच्याशी संपर्क साधला आणि त्यांना रकमेबद्दल माहिती दिली.
ही रक्कम परत करताना पारध येथील मान्यवर हाफिज सादिक कारीसाहब, अनिस शाह, सईद शहा, विठ्ठल लक्कस आणि रुस्तम शाह हे उपस्थित होते. रईस शाह यांनी सर्वांच्या साक्षीने कोणतीही कटकट न करता ती संपूर्ण रक्कम निलेश साळुंखे यांना सन्मानाने परत केली.
सर्व स्तरांतून कौतुकाचा वर्षाव
एवढी मोठी रक्कम असूनही ती क्षणाचाही विलंब न लावता परत करणाऱ्या रईस शाह यांच्या या कृतीचे सर्वत्र कौतुक होत आहे. रईस शाह यांनी आजच्या काळातही “माणुसकी आणि प्रामाणिकपणा” जिवंत असल्याचे सिद्ध केले आहे. निलेश साळुंखे यांनी रईस शाह यांचे आभार मानले असून, परिसरातील नागरिकांकडून त्यांच्यावर अभिनंदनाचा वर्षाव होत आहे.
