पारधच्या शिरपेचात मानाचा तुरा! अविनाश अंधारे यांची मुंबई मनपा, तर अनिल देशमुख यांची पोलीस दलात निवड
By तेजराव दांडगे
पारधच्या शिरपेचात मानाचा तुरा! अविनाश अंधारे यांची मुंबई मनपा, तर अनिल देशमुख यांची पोलीस दलात निवड
पारध (विशेष प्रतिनिधी): जिद्द, चिकाटी आणि कठोर परिश्रमाच्या जोरावर ग्रामीण भागातील तरुणही यशाची मोठी शिखरे सर करू शकतात, हे पारध (ता. भोकरदन) येथील दोन सुपुत्रांनी दाखवून दिले आहे. अविनाश समाधान अंधारे आणि अनिल शंकरराव देशमुख या दोन तरुणांनी स्पर्धा परीक्षेत दैदिप्यमान यश संपादन करत गावचे नाव उज्ज्वल केले आहे.
प्रशासकीय सेवेत मोठी झेप
अविनाश समाधान अंधारे यांची बृहन्मुंबई महानगरपालिकेच्या (BMC) सामान्य प्रशासन विभागात ‘कार्यकारी सहाय्यक’ पदावर निवड झाली आहे. तर, अनिल शंकरराव देशमुख यांनी महाराष्ट्र पोलीस दलात प्रवेश मिळवला असून, त्यांची जालना पोलीस दलात निवड झाली आहे. अत्यंत स्पर्धात्मक वातावरणात या दोघांनीही मिळवलेले यश कौतुकास्पद आहे.
यशाचे गमक: योग्य मार्गदर्शन आणि सातत्य
या दोन्ही यशस्वी उमेदवारांनी गजानन तबडे सर यांच्या मार्गदर्शनाखाली स्पर्धा परीक्षेची तयारी केली होती. तसेच, ‘यशश्री अभ्यासिका’ येथे नियमित सराव आणि अभ्यासातील सातत्यामुळे त्यांनी हे ध्येय गाठले आहे. ग्रामीण भागात राहूनही योग्य दिशा मिळाली, तर यश नक्की मिळते, असे मत या दोन्ही तरुणांनी व्यक्त केले.
गावात जल्लोष आणि शुभेच्छांचा वर्षाव
या निवडीची बातमी गावात पोहोचताच पारधमध्ये आनंदाचे वातावरण निर्माण झाले. पारध बस स्टँड परिसरातील छत्रपती शिवाजी महाराज चौकात फटाक्यांची आतषबाजी आणि गुलालाची उधळण करत ग्रामस्थांनी जल्लोष साजरा केला.
यावेळी मा. पंचायत समिती सभापती परमेश्वर पाटील लोखंडे, मा. सरपंच गणेश पाटील लोखंडे यांच्यासह भारतीय जनता पार्टीचे पदाधिकारी, कार्यकर्ते आणि ग्रामस्थ मोठ्या संख्येने उपस्थित होते. सर्वांनी दोन्ही युवकांचा सत्कार करून त्यांच्या पुढील वाटचालीस शुभेच्छा दिल्या.
तरुणांसाठी ठरले प्रेरणास्थान
अविनाश आणि अनिल यांच्या यशामुळे पारध परिसरातील इतर विद्यार्थ्यांमध्येही नवी उमेद निर्माण झाली आहे. स्पर्धा परीक्षेच्या माध्यमातून सरकारी सेवेत जाण्याचे स्वप्न पाहणाऱ्या ग्रामीण तरुणांसाठी हे यश प्रेरणादायी ठरणार आहे.
