राष्ट्रीय खाद्यतेल अभियान : तेलबिया काढणी पश्चात पायाभूत सुविधा (तेल काढणी युनिट) व गोदाम या घटकासाठी प्राप्त अर्जाची सोडत

राष्ट्रीय खाद्यतेल अभियान : तेलबिया काढणी पश्चात पायाभूत सुविधा, (तेल काढणी युनिट) व गोदाम या घटकासाठी प्राप्त अर्जाची सोडत

जालना,दि.30 : राष्ट्रीय खाद्यतेल अभियान–तेलबिया (सन 2026-27) अंतर्गत जालना जिल्ह्यासाठी फ्लेक्सी घटकातून गोदाम (250 मेट्रिक टन) बांधकाम तसेच काढणी पश्चात पायाभूत सुविधा (तेल काढणी युनिट) या घटकांसाठी लाभार्थी निवडीची सोडत दि. 4 ऑगस्ट 2026 रोजी सकाळी 11 वाजता जिल्हा अधीक्षक कृषी अधिकारी यांच्या दालनात काढण्यात येणार असल्याची माहिती जिल्हा अधीक्षक कृषी अधिकारी जी. आर. कापसे यांनी प्रसिद्धीपत्रकाद्वारे दिली आहे.

राष्ट्रीय खाद्यतेल अभियान–तेलबिया अंतर्गत जालना जिल्ह्यासाठी फ्लेक्सी घटकातून 250 मेट्रिक टन क्षमतेच्या गोदामाच्या बांधकामासाठी एक भौतिक लक्ष्य प्राप्त झाले असून, या घटकासाठी प्रकल्प खर्चाच्या 50 टक्के किंवा कमाल 14.40 लाख रुपयांपर्यंत अनुदान देण्यात येणार आहे. तसेच काढणी पश्चात पायाभूत सुविधा (तेल काढणी युनिट) या घटकासाठीही एक भौतिक लक्ष्य मंजूर असून, त्यासाठी प्रकल्प खर्चाच्या 33 टक्के किंवा कमाल 9.90 लाख रुपयांपर्यंत अनुदान उपलब्ध आहे.

या दोन्ही घटकांसाठी इच्छुक शेतकरी उत्पादक कंपन्यांकडून तालुका कृषी अधिकारी कार्यालयामार्फत अर्ज स्वीकारण्यात आले असून, ते जिल्हा अधीक्षक कृषी अधिकारी कार्यालयास प्राप्त झाले आहेत. शासनाच्या मार्गदर्शक सूचनांनुसार प्राप्त अर्जांमधून लाभार्थ्यांची निवड पारदर्शक पद्धतीने सोडत काढून करण्यात येणार आहे.

सोडत प्रक्रियेदरम्यान संबंधित अधिकारी, कर्मचारी तसेच अर्जदार शेतकरी उत्पादक कंपन्यांचे प्रतिनिधी उपस्थित राहणार असून, संपूर्ण प्रक्रिया त्यांच्या समक्ष पार पाडण्यात येईल. त्यामुळे संबंधित अधिकारी, कर्मचारी तसेच शेतकरी उत्पादक कंपन्यांच्या प्रतिनिधींनी दि. 4 ऑगस्ट रोजी सकाळी 11 वाजता जिल्हा अधीक्षक कृषी अधिकारी कार्यालयात वेळेत उपस्थित राहावे, असे आवाहन जिल्हा अधीक्षक कृषी अधिकारी जी. आर. कापसे यांनी केले आहे.