पारध येथे बारी समाजाचे आराध्य दैवत कर्मयोगी संत श्री रुपलाल महाराजांची १२५ वी जयंती उत्साहात साजरी

पारध येथे बारी समाजाचे आराध्य दैवत कर्मयोगी संत श्री रुपलाल महाराजांची १२५ वी जयंती उत्साहात साजरी

पारध:- बारी समाजाचे आराध्य दैवत कर्मयोगी संत श्री रुपलाल महाराज यांची १२५ वी जयंती भोकरदन तालुक्यातील पारध शाहूराजे परिसरातील रामनगर (चौरीवाडी) येथील श्रीराम मंदिर सभागृहात बारी समाज बांधवांच्या उपस्थितीत उत्साहपूर्ण वातावरणात साजरी करण्यात आली.भक्तिमय वातावरणात झालेल्या या कार्यक्रमास गावातील बारी समाजबांधवांसह महिलांचीही मोठी उपस्थिती होती.

कार्यक्रमाच्या सुरुवातीला संत श्री रुपलाल महाराज यांच्या प्रतिमेचे पूजन प्रमुख पाहुणे आणि मान्यवरांच्या हस्ते करण्यात आले. यावेळी उपस्थितांनी ‘संत रुपलाल महाराज की जय’ असा जयघोष केला. त्यानंतर कार्यक्रमाचे प्रमुख पाहुणे शिवसेना (उबाठा)गटाचे जालना जिल्हाप्रमुख तथा माजी सभापती मनीषभैया श्रीवास्तव यांचा सुभाष कोथळकर यांच्या हस्ते सत्कार करण्यात आला.

यावेळी मार्गदर्शन करताना मनीषभैया श्रीवास्तव म्हणाले की, पारध परिसरातील वालसावंगी, पिंपळगाव रेणुकाई, सावंगी अवघडराव, कोसगाव, आन्वा,कोदा,वालसा वडाळा,भारज या भागात बारी समाज मोठ्या संख्येने वास्तव्यास आहे. हा समाज कष्टाळू आणि प्रामाणिक असून आपल्या मेहनतीच्या बळावर राज्याच्या विकासात योगदान देत आहे.

“शासनाने बारी समाजासाठी संत श्री रुपलाल महाराज आर्थिक विकास महामंडळ मंजूर केले आहे. मात्र अद्याप या महामंडळासाठी आवश्यक आर्थिक निधीची तरतूद झालेली नाही. तसेच संत रुपलाल महाराज यांच्या राष्ट्रीय स्मारकाचे कामही प्रलंबित आहे. या मागण्यांसाठी मी बारी समाजाच्या पाठीशी ठामपणे उभा असून शासन स्तरावर शक्य ती मदत व पाठपुरावा करण्याचा प्रयत्न करेन,” असे आश्वासन मनीषभैया श्रीवास्तव यांनी दिले.

तसेच यापुढे संत रुपलाल महाराजांची जयंती पारध गावामध्ये व्यापक स्वरूपात साजरी करावी. भजन, पूजन तसेच मिरवणुकीचे आयोजन करून संतांच्या विचारांचा आणि भक्तीभावाचा समाजात प्रसार करावा, असे आवाहनही त्यांनी केले.

यावेळी सामाजिक कार्यकर्ते गणेश तेलंग्रे यांनी संत रुपलाल महाराज यांच्या जीवनचरित्रावर प्रकाश टाकला. संत रुपलाल महाराज यांच्या विचारांचा आदर्श समाजाने स्वीकारावा आणि बारी समाजाने एकत्र येऊन दरवर्षी महाराजांची जयंती व पुण्यतिथी भक्तिभावाने साजरी करावी, असे त्यांनी सांगितले.

कार्यक्रमाचे सूत्रसंचालन अखिल भारतीय बारी समाज महासंघाचे भोकरदन तालुका उपाध्यक्ष महेंद्र बेराड यांनी केले, तर पारध ग्रामपंचायत सदस्य बबलू तेलंग्रे यांनी आभारप्रदर्शन केले.

यावेळी रामदास भुते, सुभाष कोथलकर, विठ्ठल बेराड, संजय कोथलकर, राजेंद्र बेराड, सुनील कोथलकर, पवन बेराड,विजय कोथळकर, प्रकाश भुते, सतीश कोथलकर, समाधान बोडखे,शंकर तेलंग्रे, रेवन कोथलकर,अमोल भुते, विशाल भुते,बबन कोथलकर यांच्यासह बारी समाजातील महिला व पुरुष बांधव मोठ्या संख्येने उपस्थित होते. यावेळी महाप्रसादाचेही आयोजन करण्यात आले होते.

संत रुपलाल महाराजांच्या जयघोषाने आणि भक्तिमय वातावरणात कार्यक्रमाची सांगता झाली.