जालना-छत्रपती संभाजीनगर रोडवर मोठी कारवाई; 85 किलो गांजा जप्त, तीन आरोपीत गजाआड
By तेजराव दांडगे
जालना-छत्रपती संभाजीनगर रोडवर मोठी कारवाई; 85 किलो गांजा जप्त, तीन आरोपीत गजाआड
जालना, दि. २४ (प्रतिनिधी) – जालना पोलिसांनी अमली पदार्थांविरुद्ध मोठी कारवाई करत जालना-छत्रपती संभाजीनगर रोडवर ८५ किलो ६४० ग्रॅम गांजा जप्त केला आहे. या प्रकरणी तीन आरोपीतांना अटक करण्यात आली असून, गांजा आणि वाहनासह एकूण २८ लाख ९३ हजार रुपयांचा मुद्देमाल पोलिसांनी ताब्यात घेतला आहे. स्थानिक गुन्हे शाखा आणि दहशतवाद विरोधी पथकाने संयुक्तपणे ही कारवाई केली.
जिल्ह्याचे पोलीस अधीक्षक अजय कुमार बंसल यांनी जिल्ह्यात अमली पदार्थांची विक्री करणाऱ्यांवर कठोर कारवाई करण्याचे आदेश दिले होते. त्यानुसार, २३ एप्रिल २०२५ रोजी स्थानिक गुन्हे शाखा आणि दहशतवाद विरोधी शाखेला गोपनीय माहिती मिळाली की, जालना शहरातून छत्रपती संभाजीनगरकडे एका MH/16/AT/8302 क्रमांकाच्या कारमधून काही लोक गांजाची अवैध वाहतूक करणार आहेत.
मिळालेल्या माहितीच्या आधारे पोलिसांनी तात्काळ सापळा रचला आणि संशयित कारला थांबवून झडती घेतली. या झडतीत ८५ किलो ६४० ग्रॅम गांजा आढळून आला. पोलिसांनी कारमधील विजय अशोक गाढे (वय ४०, रा. शेवगाव, जि. अहिल्यानगर), अमोल द्वारकादास चांदणे (वय ३२, रा. रुई, ता. अंबड, जि. जालना) आणि बाबासाहेब पंढरीनाथ मुंजवार (वय ३६, रा. भार्डी, ता. अंबड, जि. जालना) या तिघांना अटक केली. पोलिसांनी घटनास्थळावरून गांजा, वाहतुकीसाठी वापरलेली कार आणि चार मोबाईल फोन असा एकूण २८ लाख ९३ हजार रुपयांचा मुद्देमाल जप्त केला आहे.
दहशतवाद विरोधी शाखेचे पोलीस उपनिरीक्षक बाबासाहेब खाडे यांच्या तक्रारीवरून चंदनझिरा पोलीस ठाण्यात या आरोपीतांविरुद्ध गुन्हा दाखल करण्यात आला आहे. पुढील तपास चंदनझिरा पोलीस ठाण्याचे पोलीस निरीक्षक करत आहेत.
ही यशस्वी कारवाई पोलीस अधीक्षक अजय कुमार बंसल, अपर पोलीस अधीक्षक आयुष नोपाणी आणि उपविभागीय पोलीस अधिकारी (जालना) अनंत कुलकर्णी यांच्या मार्गदर्शनाखाली स्थानिक गुन्हे शाखेचे पोलीस निरीक्षक पंकज जाधव, सहाय्यक पोलीस निरीक्षक योगेश उबाळे, पोलीस उपनिरीक्षक राजेंद्र वाघ, पोलीस उपनिरीक्षक बाबासाहेब खार्डे, पोलीस उपनिरीक्षक यासिन, सहाय्यक पोलीस उपनिरीक्षक शेख अख्तर, पोलीस हवालदार मारोती शिवरकर, विनोद गडदे, कैलास कुरेवाड (ATB जालना), स्थानिक गुन्हे शाखेचे रुस्तुम जैवाळ, रामप्रसाद पव्हरे, गोपाल गोशीक, सतीष श्रीवास, इरशाद पटेल, सचिन राऊत, कैलास चेके, चालक भरत कडुळे, सौरभ मुळे आणि गणेश वाघ (फोटोग्राफर) यांच्या पथकाने केली.
