स्थानिक गुन्हे शाखेची कारवाई: जालन्यात बकरी चोरणाऱ्या टोळीचा पर्दाफाश; १८ गुन्हे उघडकीस, ४ लाखांहून अधिक मुद्देमाल जप्त
By तेजराव दांडगे
स्थानिक गुन्हे शाखेची कारवाई: जालन्यात बकरी चोरणाऱ्या टोळीचा पर्दाफाश; १८ गुन्हे उघडकीस, ४ लाखांहून अधिक मुद्देमाल जप्त
जालना (विशेष बातमीदार): जालना जिल्हा पोलीस अधीक्षक तेघबीर सिंह संधू यांच्या मार्गदर्शनाखाली स्थानिक गुन्हे शाखेने (LCB) कारवाई करत बकरी चोरी करणाऱ्या एका अट्टल टोळीचा पर्दाफाश केला आहे. या कारवाईत पोलिसांनी एका आरोपीताला जेरबंद केले असून चोरीसाठी वापरण्यात आलेली स्विफ्ट कार व इतर साहित्य असा ४,०१,२०० रुपयांचा मुद्देमाल जप्त केला आहे. या कारवाईमुळे जालना जिल्ह्यातील विविध पोलीस ठाण्यांमधील १८ गुन्हे उघडकीस आले आहेत.
अशी झाली कारवाई
जिल्ह्यात वाढत्या जनावर चोरीच्या घटनांवर आळा घालण्यासाठी आणि चोरांचा शोध घेण्यासाठी पोलीस अधीक्षक तेघबीर सिंह संधू यांनी स्थानिक गुन्हे शाखेचे पोलीस निरीक्षक पंकज जाधव यांना सूचना दिल्या होत्या. त्या अनुषंगाने पथकातील अधिकारी व अंमलदार संशयितांची माहिती काढत होते.
दिनांक २३ सप्टेंबर रोजी परतूर येथून आठ बकऱ्या चोरी प्रकरणाचा तपास करत असताना, रईस सरदार शहा (रा. सिरसगाव मंडप, ता. भोकरदन) याने आपल्या साथीदारासह ही चोरी केल्याची गुप्त माहिती पोलिसांना मिळाली. या माहितीच्या आधारे हसनाबाद परिसरातून आरोपीताला ताब्यात घेण्यात आले. सुरुवातीला उडवाउडवीची उत्तरे देणाऱ्या आरोपीताने पोलिसांच्या खाक्या दाखवताच परतूर येथील गुन्ह्याची कबुली दिली.
आरोपीत आणि जप्त मुद्देमाल
- अटक आरोपीत: रईस सरदार शहा (वय २० वर्षे, रा. सिरसगाव मंडप, ता. भोकरदन, जि. जालना)
- फरार आरोपीत: सलीम सांडू शेख (रा. औरंगपुरा, छत्रपती संभाजीनगर)
- जप्त मुद्देमाल: रु. ४,०१,२००/- किमतीची स्विफ्ट कार आणि चोरीसाठी वापरलेले साहित्य.
१८ गुन्ह्यांची कबुली; ‘या’ पोलीस ठाण्यांतील गुन्हे उघडकीस
आरोपीताकडे कसून चौकशी केली असता, त्याने आपल्या साथीदारासह मागील दीड ते दोन वर्षांपासून जिल्ह्यातील सदर बाजार (जालना), तालुका जालना, चंदनझिरा, बदनापूर, मंठा, अंबड, तीर्थपुरी, मौजपुरी आणि पारध पोलीस ठाण्याच्या हद्दीत बकऱ्या चोरी केल्याची कबुली दिली. या सर्व ठिकाणी गुन्हे दाखल असल्याचे पोलीस अभिलेखावरून स्पष्ट झाले आहे.
पुढील तपासासाठी आरोपीताला परतूर पोलीस ठाण्याच्या स्वाधीन करण्यात आले असून, फरार साथीदाराचा शोध पोलीस घेत आहेत.
