अमडापूर महामेळाव्यातील कलावंतांना ‘प्रशंसा पत्र’ वितरण; हा कलावंतांचा मोठा सन्मान – माजी न्यायाधीश सुरेश घोरपडे
By अनिल जाधव
अमडापूर महामेळाव्यातील कलावंतांना ‘प्रशंसा पत्र’ वितरण; हा कलावंतांचा मोठा सन्मान – माजी न्यायाधीश सुरेश घोरपडे
दि. २० जून २०२६ | चिखली: “महाराष्ट्रात शेकडो वर्षांपासून सामाजिक प्रबोधनाची परंपरा लोक कलावंत, गायक, कवी आणि शाहिरांनी जिवंत ठेवली आहे. जागतिक महिला दिनाच्या निमित्ताने आयोजित भव्य महामेळाव्यात प्रबोधन करणाऱ्या चिखलीतील कलावंतांना जिल्हा विधी प्राधिकरणाकडून मिळालेले प्रशंसा पत्र, हा या लोककलावंतांचा फार मोठा सन्मान आहे,” असे गौरवद्गार माजी न्यायाधीश सुरेश घोरपडे यांनी काढले.
चिखली येथील ऐतिहासिक फुले-आंबेडकर वाटिकेमध्ये आयोजित एका विशेष कार्यक्रमात, महामेळाव्यात सहभागी झालेल्या कलावंतांना माजी न्यायाधीश सुरेश घोरपडे आणि स्थानिक सामाजिक कार्यकर्त्यांच्या हस्ते अधिकृत प्रशंसा पत्रांचे वितरण करण्यात आले.
🏛️ ‘म्हालसा’ च्या मार्गदर्शनाखाली झाला होता महामेळावा
माननीय सर्वोच्च न्यायालयाच्या निर्देशानुसार आणि ‘म्हालसा’ (MHALSAs) च्या मार्गदर्शनाखाली जागतिक महिला दिनाचे औचित्य साधून बुलढाणा जिल्हा न्यायालयाच्या वतीने चिखली तालुक्यातील अमडापूर येथील श्री. बल्लाळदेवी संस्थान परिसरात एक भव्य महामेळावा आयोजित करण्यात आला होता. मुंबई उच्च न्यायालयाचे माननीय न्यायमूर्ती, जिल्हा न्यायाधीश आणि जिल्हाधिकारी यांच्या प्रमुख उपस्थितीत हा मेळावा सर्वार्थानं संपन्न झाला होता.
🎶 पंचशील भजनी मंडळाच्या प्रबोधनाची दखल
या महामेळाव्यामध्ये चिखली येथील अंदाजे ६५ वर्षांची सामाजिक प्रबोधनाची मोठी परंपरा असलेल्या ‘पंचशील भजनी मंडळाने’ आपल्या सुंदर संगीतमय गीतगायन आणि कलापथकाद्वारे प्रासंगिक प्रबोधनपर सादरीकरण केले होते. या सादरीकरणाची विशेष दखल बुलढाणा जिल्हा विधी सेवा प्राधिकरणाने घेतली.
प्राधिकरणाकडून पाठवण्यात आलेली ही कौतुक प्रशंसा पत्रे मंडळाचे संस्थापक अध्यक्ष तथा हरहुन्नरी अभिनेते कलावंत ॲड. विजयकुमार कस्तुरे यांच्याकडे सुपूर्द करण्यात आली होती, ज्यांचे आज चिखलीत वितरण झाले.
👥 ‘या’ हरहुन्नरी कलावंतांचा झाला गौरव
कार्यक्रमादरम्यान पंचशील भजनी मंडळाच्या खालील सर्व सहभागी कलावंतांना सन्मानित करण्यात आले:
ॲड. विजयकुमार कस्तुरे (संस्थापक अध्यक्ष), ॲड. रेखा हणमंते (कस्तुरे), सुरेश अवसरमोल, जितेंद्र भिसे, साहेबराव बोर्डे, प्रतिक वानखेडे, कु. आराध्या डुकरे, अलका पाटील, महेंद्र मोरे या कौतुकास्पद सोहळ्याला चिखली परिसरातील नागरिक, शिक्षक आणि कलाप्रेमी मोठ्या संख्येने उपस्थित होते. सर्वांनी सन्मानित कलावंतांचे मनःपूर्वक अभिनंदन केले आहे.
