पिके वाळली; बळीराजा संकटात: आमदार संतोष पाटील दानवे यांच्याकडून भोकरदन तालुक्यातील बाधित शेतशिवारांची पाहणी

पिके वाळली; बळीराजा संकटात: आमदार संतोष पाटील दानवे यांच्याकडून भोकरदन तालुक्यातील बाधित शेतशिवारांची पाहणी

जळगाव सपकाळ : पावसाने दडी मारल्याने भोकरदन तालुक्यातील अनेक गावांमध्ये दुष्काळसदृश परिस्थिती निर्माण झाली असून, पाण्याअभावी शेतातील उभी पिके वाळून जाण्याच्या मार्गावर आहेत. या गंभीर परिस्थितीची प्रत्यक्ष पाहणी करण्यासाठी आमदार संतोष पाटील दानवे यांनी विविध गावांतील शेतशिवारांना भेट देत शेतकऱ्यांशी संवाद साधला.

वाकडी, कुकडी, अनवा, जळगाव सपकाळ, कोदा, कारला वाडी आणि जानेफळ या परिसरातील शेतांमध्ये जाऊन आमदार दानवे यांनी पिकांची पाहणी केली. कडक उन्हामुळे जमिनीतील ओलावा कमी झाला असून, सिंचनासाठी पाण्याची उपलब्धता नसल्याने पिकांची अवस्था चिंताजनक असल्याचे यावेळी निदर्शनास आले.

शेताच्या बांधावर शेतकऱ्यांशी संवाद साधताना त्यांनी पिकांचे नुकसान, पाण्याची उपलब्धता, सिंचनाची परिस्थिती तसेच जनावरांसाठी निर्माण झालेला चारा-पाण्याचा प्रश्न याबाबत माहिती घेतली. मेहनतीने उभे केलेले पीक हातातून जाण्याची भीती शेतकऱ्यांनी व्यक्त केली.

तात्काळ पंचनामे करण्याची मागणी

पावसाअभावी बाधित झालेल्या पिकांचे प्रशासनाकडून तात्काळ वस्तुनिष्ठ पंचनामे करून नुकसानग्रस्त शेतकऱ्यांना शासनाची आर्थिक मदत मिळवून देण्यासाठी पाठपुरावा केला जाईल, असे आमदार संतोष पाटील दानवे यांनी सांगितले.

बळीराजाला वाऱ्यावर सोडणार नाही

“संकटाच्या काळात बळीराजाला वाऱ्यावर सोडणार नाही. शेतकऱ्यांच्या व्यथा शासन दरबारी मांडून त्यांच्या हक्काची मदत मिळवून देण्यासाठी सर्वतोपरी प्रयत्न केले जातील. बाधित पिकांचे पंचनामे आणि दुष्काळी सवलती मिळण्यासाठी प्रशासनाकडे पाठपुरावा करू,” अशी ग्वाही आमदार दानवे यांनी यावेळी दिली.

या पाहणीदरम्यान परिसरातील शेतकरी बांधवांनी आपल्या समस्या आमदारांसमोर मांडल्या. पिकांचे प्रत्यक्ष नुकसान पाहून प्रशासनाने तातडीने उपाययोजना करण्याची मागणी शेतकऱ्यांकडून करण्यात आली.